HYDRA : ఒక్క క్లిక్‌తో హైదరాబాద్‌లో మీరు కొనే స్థలం లేదా ఇల్లు పూర్తి వివరాలు.. HMDA కొత్త వెబ్‌సైట్‌లో ఇలా సింపుల్‌గా చెక్ చేసుకోండి!
Hyderabad Metropolitan Development Authority : హెచ్‌ఎండీఏ అధికారికంగా కొత్త వెబ్‌సైట్‌ను అందుబాటులోకి తీసుకొచ్చింది. ఈ వెబ్‌సైట్‌ ద్వారా సింపుల్ ఎఫ్‌టీఎల్‌, బఫర్ జోన్‌లను తెలుసుకోవచ్చు. వివరాల్లోకెళ్తే..
హైదరాబాద్‌లో సొంతిల్లు లేదా ఫ్లాట్‌ కొనుగోలు చేయడం అనేది ప్రతి ఒక్కరికీ ఓ కల. ఆ కలను సాకారం చేసుకునేందుకు నిత్యం కష్టపడుతూ.. తమ జీవితాంతం సంపాదించిన డబ్బును పెట్టుబడిగా పెట్టి ఇల్లు లేదా స్థలం కొంటుంటారు. ఇందుకోసం బ్యాంకుల నుంచి లక్షల రూపాయల లోన్ కూడా తీసుకుంటారు. ప్రతి నెల తమ ఆదాయంలో దాదాపు 40 శాతం వరకు ఈఎంఐ కట్టడానికి కూడా వెనకాడరంటే అర్థం చేసుకోవచ్చు
అయితే.. సొంత ఇల్లు లేదా స్థలం కొనుక్కునే సమయంలో కొన్ని జాగ్రత్తలు తప్పనిసరిగా పాటించాల్సి ఉంటుంది. ప్రస్తుతం హైదరాబాద్‌లో ఎక్కడ చూసినా హైడ్రా (HYDRA) హడల్ కనిపిస్తోంది. హైదరాబాదులో చాలావరకు చెరువులు, కాలువలు, అప్రోచ్ కెనాల్స్ ఆక్రమించి లేఔట్లుగా మార్చి రియల్టర్లు విక్రయిస్తున్నారు. ఇది ముమ్మాటికీ చట్ట విరుద్ధమైన పని. వీటికి ఫుల్ ట్యాంక్ లెవెల్ (FTL), బఫర్ జోన్ అంటే క్యాచ్ మెంట్ ఏరియా ఉంటాయి. అయితే నగరంలో జనాభా పెరిగే కొద్దీ చెరువుల బఫర్ జోన్, ఫుల్ ట్యాంక్ లెవెల్ పరిధిలో కూడా అక్రమ లేఔట్లు వేసి ప్లాట్లు, ఇళ్లు, విల్లాలు, అపార్ట్‌మెంట్లు కడుతున్నారు. ఇది భవిష్యత్తులో కొనుగోలుదారులకు ఇబ్బందిగా మారనుంది. ఇందుకోసం హైదరాబాద్ మెట్రోపాలిటన్‌ డెవలప్‌మెంట్‌ అథారిటీ (HMDA) ఓ పరిష్కారం తీసుకొచ్చింది.
మీరు ఎంతో కష్టపడి కొనుగోలు చేయబోతున్న ప్లాటు లేదా ఇల్లు, బఫర్ జోన్, FTL పరిధిలో ఉందా? లేదా అనే విషయాన్ని సులభంగా తెలుసుకునేందుకు HMDA ఒక పరిష్కారాన్ని కనిపెట్టింది. హైదరాబాదులో ఉన్న చెరువులను గుర్తించి, వాటి బఫర్ జోన్ నిర్ణయించింది. నిజానికి బఫర్ జోన్‌లో వ్యవసాయం లేదా ఇతర వ్యవసాయ సంబంధిత పనులు చేసుకోవచ్చు. కానీ శాశ్వత నిర్మాణాలు చేపట్టకూడదు. వీటికి పట్టా కూడా ఉంటుంది. కానీ చట్టంలో ఉన్న లూప్ హోల్‌ను వాడుకొని.. కొంతమంది రియల్టర్లు ఈ పట్టాను అడ్డం పెట్టుకొని శాశ్వత నిర్మాణాలు చేపట్టి కస్టమర్లకు విక్రయిస్తున్నారు. ఈ సమస్యకు పరిష్కారంగా HMDA తాజాగా https://lakes.hmda.gov.in/ అనే అఫీషియల్ వెబ్‌సైట్‌ విడుదల చేసింది.
ఈ వెబ్‌సైట్‌లో మీ జిల్లా, మండలం, గ్రామం పేరు ఆధారంగా మీ స్థలం బఫర్ జోన్ లేదా ఎఫ్‌టీఎల్‌ పరిధిలో ఉందా లేదా అని చెక్ చేసుకోవచ్చు. దీనివల్ల మీరు ఎంతో శ్రమించి కొనుగోలు చేయనున్న ఇల్లు లేదా స్థలం సురక్షితమా కాదా అని తెలుసుకోవచ్చు. ఒకవేళ మీరు కొన్న ప్లాటు బఫర్ జోన్ లేదా ఎఫ్‌టీఎల్‌ పరిధిలో కనుక ఉన్నట్లయితే.. అది నివాసయోగ్యం కాదు అని తెలుసుకుని వెంటనే మీ ఆలోచనను విరమించుకోవచ్చు. అలాగే.. మీరు ప్లాట్ కొనుగోలు చేసే సమయంలో కచ్చితంగా ఈ వెబ్‌సైట్‌ ద్వారా సర్వే నెంబర్లను గుర్తించవచ్చు. తద్వారా మీరు నష్టపోకుండా ఉంటారు. ఈ విషయాన్ని మాత్రం హైదరాబాద్‌లో మీరు ఇల్లు, స్థలం కొనుగోలు చేసేటప్పుడు తప్పనిసరిగా గుర్తుపెట్టుకోండి!
ఆన్‌లైన్‌లో చెక్ చేసుకునే ప్రాసెస్‌ ఇదే:
మొదట హెచ్‌ఎండీఏ అధికారిక వెబ్‌సైట్‌ https://lakes.hmda.gov.in/ ఓపెన్‌ చేయాలి
ఇందులో జిల్లా, మండలం, గ్రామం, లేక్‌ లేదా కుంట లేదా చెరువు పేరు, ఐడీ నెంబర్‌ అనే ఆప్షన్లు కనిపిస్తాయి.
కిందన మీ జిల్లాని ఎంచుకుంటే.. మండలం, గ్రామం, లేక్‌ లేదా కుంట లేదా చెరువు పేరు, ఐడీ నెంబర్‌ కనిపిస్తాయి.
వీటిలో మీకు కావాల్సిన లేక్‌ లేదా కుంట లేదా చెరువు పేరు, ఐడీ నెంబర్‌ ఎంటర్‌ చేసి సెర్చ్‌ ఆప్షన్‌పై క్లిక్‌ చేయాలి.
వెంటనే కుడి చేతి వైపు మీకు కావల్సిన ఎఫ్‌టీఎల్‌, బఫర్ జోన్ ఆప్షన్లు కనిపిస్తాయి.
ఈ ఆప్షన్లపై క్లిక్‌ చేసి మీకు కావల్సిన సమాచారాన్ని తెలుసుకోవచ్చు.
