నాపై కోపం ఉంటే రాజకీయంగా కక్ష సాధించండి.. కానీ..
పాలమూరు అభివృద్దిని అడ్డుకోవద్దని తెలంగాణ ముఖ్యంత్రి రేవంత్ రెడ్డి అన్నారు. తెలంగాణ వచ్చి పదేళ్లవుతున్నా పాలమూరు నుంచి వలసలు కొనసాగుతూనే ఉన్నాయని చెప్పారు
.పాలమూరును అభివృద్ది చేద్దామని, వలసలను ఆపాలని ప్రయత్నిస్తుంటే.. ఆరోపణలతో చిల్లర రాజకీయాలు చేయాలని చూస్తున్నారని ప్రతిపక్షాలపై మండిపడ్డారు. పాలమూరుకు అన్యాయం జరిగిందని.. ఈ ప్రాంతానికి చెందిన తాను తెలంగాణ ముఖ్యమంత్రి అయ్యానని.. ఈ జిల్లాకు నిధులు కేటాయించి, ప్రాజెక్టులు పూర్తి చేసుకోకపోతే చరిత్ర తనను క్షమించదని అన్నారు.
పాలమూరు అభివృద్దిని అడ్డుకోవద్దని కోరారు. తనపై రాజకీయంగా కోపం ఉంటే ఇంకో రకంగా రాజకీయ కక్ష సాధించుకోండని అన్నారు.పాలమూరు అభివృద్దిని అడ్డుకునేందుకు యత్నిస్తే చరిత్రహీనులుగా మిగిలిపోతారని విమర్శించారు.
సీఎం రేవంత్ రెడ్డి ఆదివారం రోజున శ్రీ కురుమూర్తి వెంకటేశ్వర స్వామి వారి బ్రహ్మోత్సవాల సందర్భంగా స్వామివారిని దర్శించుకున్నారు. దేవాలయంలో లక్ష్మీదేవి, భూదేవి అమ్మవార్లను దర్శించుకుని ఆశీర్వచనం తీసుకున్నారు. శ్రీ కురుమూర్తి స్వామి ఆలయానికి రూ. 110 కోట్ల అంచనా వ్యయంతో చేపడుతున్న ఘాట్ రోడ్డు, ఎలివేటెడ్ కారిడార్ నిర్మాణానికి శంకుస్థాపన చేశారు.
అనంతరం అక్కడ ఏర్పాటు చేసిన కార్యక్రమంలో సీఎం రేవంత్ రెడ్డి మాట్లాడుతూ.. దేవాలయ అభివృద్ధి కార్యక్రమాలకు అంచనాలు రూపొందించి నివేదిక ఇవ్వాలని అధికారులను ఆదేశించారు.
పాలమూరు జిల్లా వలసలకు మారుపేరుగా ఉందని ఆవేదక వ్యక్తం చేశారు. గత పాలకుల నిర్లక్ష్యం కారణంగా పాలమూరు జిల్లాలో ప్రాజెక్టులు పూర్తి కాలేదని విమర్శించారు. ప్రజా ప్రభుత్వ భగీరథ ప్రయత్నాన్ని అడ్డుకోవాలని చూడొద్దని కోరారు.
”మీరు(బీఆర్‌ఎస్) అధికారంలో ఉన్నప్పుడు మీ నియోజకవర్గాలను అభివృద్ధి చేశారు కానీ.. ఇప్పుడు మా అభివృద్ధిని అడ్డుకునేందుకు ప్రయత్నిస్తున్నారు” అని రేవంత్ రెడ్డి అన్నారు. నారాయణపేట-కొడంగల్‌ ప్రాజెక్టును పూర్తి చేసి త్వరలోనే మక్తల్‌, నాగర్‌కర్నూల్‌, కొడంగల్‌ ప్రాంతాలకు కృష్ణా జలాలు తీసుకొస్తామని చెప్పారు.
పాలమూరు వలసల నిరోధించడానికి జిల్లాలో ప్రాజెక్టులను పూర్తి చేసి పాడి పంటలతో విలసిల్లేలా ప్రభుత్వ నిర్ణయాలు ఉంటాయని చెప్పారు. ఈ జిల్లా బిడ్డగా సాగునీటి ప్రాజెక్టులు పూర్తి చేయకపోతే తనను చరిత్ర క్షమించదని అన్నారు. అభివృద్దిని అడ్డుకోవాలని చూసే వారిని పాలమూరు జిల్లా ప్రజలు క్షమించరని.. అలాంటివారు చరిత్ర హీనులుగా మిగిలిపోతారని చెప్పారు.
జిల్లాలో అమర్‌రాజా బ్యాటరీస్ కంపెనీలో 2 వేల మంది స్థానిక నిరుద్యోగులకు నైపుణ్య శిక్షణ ఇచ్చి ఉద్యోగాలు ఇవ్వడానికి కంపెనీ అంగీకరించిందని సీఎం రేవంత్ రెడ్డి చెప్పారు. ఈ ప్రాంతంలో ఏ కంపెనీలు వచ్చినా ఈ ప్రాంత నిరుద్యోగులకు శిక్షణ ఇచ్చి ఉద్యోగాలు ఇప్పించే బాధ్యత ప్రభుత్వానిదని తెలిపారు.
జిల్లాలో గ్రామ గ్రామానికి, తండాలకు బీటీ రోడ్లు వేసే బాధ్యత తమదని.. ఆ దిశగా చర్యలు తీసుకోవాలని కలెక్టర్లకు ఆదేశాలు ఇస్తున్నట్టుగా తెలిపారు. విద్య, వైద్యం, ఉపాధి అవకాశాలు కల్పించి జిల్లాను అభివృద్ధి పథంలో ముందుకు నడిపించుకుందామని పిలుపునిచ్చారు.
