లోన్ ఇప్పించామంటూ రూ.1000 వసూళ్లు…
లోన్ పేరుతో లూటీ…స్వయం సహాయక సంఘాల్లో అక్రమ వసూళ్ల ఆరోపణలు
పేదల లోన్పై మళ్లీ భారం… అధికారుల నిర్లక్ష్యం
స్వయం సహాయక సంఘాల్లో పారదర్శకత ఎక్కడ?
సీకే న్యూస్ ప్రతినిధి ఇస్లావత్ నరసింహ ఏన్కూరు ఫిబ్రవరి 13 2026: గ్రామీణ ప్రాంతాల్లో మహిళల ఆర్థిక సాధికారత కోసం ప్రభుత్వం ప్రవేశపెట్టిన ఐకేపీ (ఇందిరా క్రాంతి పథకం) ఎస్ హెచ్ జి స్వయం సహాయక సంఘాల్లో సభ్యుల నుంచి అక్రమ వసూళ్లు జరుగుతున్నాయనే ఆరోపణలు రోజురోజుకీ పెరుగుతున్నాయి.
లోన్లు మంజూరు చేయించామని చెప్పి ఒక్కో సభ్యురాలి నుంచి రూ.800 నుంచి రూ.1000 వరకు డబ్బులు వసూలు చేస్తున్నట్లు బాధిత మహిళలు వెల్లడిస్తున్నారు.
సేవ పేరిట వసూళ్లు:- ఎస్ హెచ్ జి వ్యవస్థలో బ్యాంకుల ద్వారా రుణాలు అందించడం ప్రభుత్వ పథకం. ఈ ప్రక్రియలో ఎలాంటి అదనపు ఫీజులు ఉండకూడదని నిబంధనలు చెబుతున్నాయి. అయితే కొంతమంది సీసీలు (కమ్యూనిటీ కోఆర్డినేటర్లు) మరియు మధ్యవర్తులు లోన్ మంజూరు అయ్యే సమయంలో “ప్రాసెసింగ్ ఖర్చు”, “ఫైల్ ఛార్జీలు”, “ఆఫీస్ ఖర్చులు” అంటూ సభ్యుల నుంచి నగదు వసూలు చేస్తున్నారని ఆరోపణలు వినిపిస్తున్నాయి.
“లోన్ ఇప్పించాం కాబట్టి ఒక్కో సభ్యురాలు వెయ్యి రూపాయలు ఇవ్వాలి” అంటూ ఒత్తిడి తెస్తున్నారని పలువురు మహిళలు కన్నీరు పెట్టుకుంటున్నారు. డబ్బు ఇవ్వకపోతే భవిష్యత్లో లోన్లు ఆపేస్తామని బెదిరింపులు కూడా వస్తున్నాయని చెబుతున్నారు.
పేద మహిళలపై ఆర్థిక భారం:-
గ్రామీణ మహిళల్లో ఎక్కువ మంది దినసరి కూలీలు, చిన్న వ్యాపారులు. వీరికి రూ.800 నుంచి రూ.1000 కూడా పెద్ద మొత్తం. కుటుంబ అవసరాల కోసం తీసుకున్న రుణం నుంచి మళ్లీ ఈ మొత్తాన్ని చెల్లించాల్సి రావడం వల్ల వారి ఆర్థిక స్థితి మరింత క్షీణిస్తోంది.
కొందరు సభ్యులు తమ పిల్లల చదువుల కోసం లేదా వైద్య ఖర్చుల కోసం తీసుకున్న లోన్లో నుంచే ఈ డబ్బులు ఇవ్వాల్సి వచ్చిందని ఆవేదన వ్యక్తం చేస్తున్నారు.
పారదర్శకత లోపం:- ఎస్ హెచ్ జి వ్యవస్థ పారదర్శకంగా ఉండాలని ప్రభుత్వం పదేపదే చెబుతున్నా, గ్రామస్థాయిలో ఆచరణలో లోపాలు ఉన్నాయనే విమర్శలు వినిపిస్తున్నాయి. గ్రూప్ సమావేశాల్లో సభ్యుల ముందే వసూళ్లు జరుగుతున్నాయని కొందరు ఆరోపిస్తున్నారు. దీనివల్ల సభ్యులు భయాందోళనకు గురవుతున్నారు.
అధికారుల స్పందన ఎక్కడ?
ఈ విషయమై మండల, జిల్లా స్థాయి అధికారులకు పలుమార్లు ఫిర్యాదులు చేసినా సరైన చర్యలు కనిపించడం లేదని బాధితులు చెబుతున్నారు. కొందరు అధికారులు “మాకు సమాచారం లేదు” అంటూ బాధ్యత తప్పించుకుంటున్నారని ఆరోపణలు ఉన్నాయి.
గ్రామీణాభివృద్ధి శాఖ ఉన్నతాధికారులు వెంటనే స్పందించి విచారణ చేపట్టి, వసూళ్లు నిజమైతే సంబంధిత సీసీలపై కఠిన చర్యలు తీసుకోవాలని మహిళా సంఘాలు డిమాండ్ చేస్తున్నాయి.
మహిళల ఆత్మగౌరవానికి భంగం:-
స్వయం సహాయక సంఘాలు మహిళలకు ఆర్థిక స్వావలంబన మాత్రమే కాకుండా, ఆత్మగౌరవాన్ని కూడా ఇస్తాయి. అయితే ఇలాంటి వసూళ్లు ఆ వ్యవస్థపై నమ్మకాన్ని దెబ్బతీస్తున్నాయని సామాజిక కార్యకర్తలు అభిప్రాయపడుతున్నారు.
తక్షణ చర్యల కోసం డిమాండ్,అక్రమ వసూళ్లపై సమగ్ర విచారణ,బాధిత మహిళలకు తిరిగి డబ్బులు చెల్లింపు,భవిష్యత్లో పారదర్శక విధానాల అమలు,ఫిర్యాదు వ్యవస్థ బలోపేతం,మహిళల అభివృద్ధి కోసం రూపొందించిన పథకాలు మధ్యలో కొందరి స్వార్థానికి బలి కాకూడదని గ్రామస్తులు స్పష్టం చేస్తున్నారు. సంబంధిత అధికారులు వెంటనే స్పందించి న్యాయం చేయాలని బాధిత మహిళలు కోరుతున్నారు.
