పండుగ పూట ఐదుగురు చిన్నారుల కిడ్నాప్ యత్నం
Web desc : సంగారెడ్డి జిల్లాలోని బృందావన్ కాలనీలో ఉగాది పండుగ పూట ఐదుగురు చిన్నారుల కిడ్నాప్ యత్నం స్థానికంగా తీవ్ర కలకలం రేపింది. మధ్యాహ్నం వేళ నిర్మానుష్యంగా ఉన్న సమయంలో ముగ్గురు దుండగులు ఆటోలో వచ్చి ఆడుకుంటున్న పిల్లలను అపహరించేందుకు ప్రయత్నించారు. అయితే చిన్నారుల సాహసం, సమయస్ఫూర్తి వల్ల ఒక పెద్ద ప్రమాదం తప్పింది. ఈ ఘటనకు సంబంధించిన పూర్తి వివరాలు ఇలా ఉన్నాయి.
ఉగాది పండుగ కావడంతో కాలనీవాసులంతా భోజనాలు ముగించుకుని ఇళ్లలో విశ్రాంతి తీసుకుంటున్న సమయంలో, ఐదుగురు చిన్నారులు బయట ఆడుకుంటున్నారు. అదే అదునుగా భావించిన ముగ్గురు వ్యక్తులు ఒక ఎలక్ట్రిక్ ఆటోలో అక్కడికి చేరుకున్నారు.
వారిలో ఒకరు ఒక బాలుడిని పట్టుకుని ఆటోలోకి లాగేందుకు ప్రయత్నించగా, ఆ బాలుడు గట్టిగా కేకలు వేశాడు. వెంటనే అప్రమత్తమైన మిగతా నలుగురు చిన్నారులు భయపడకుండా రాళ్లతో కిడ్నాపర్లపై దాడికి దిగారు. పిల్లలందరూ కలిసి పెద్దగా అరుపులు కేకలు వేయడంతో స్థానికులు భారీగా అక్కడికి చేరుకున్నారు.
జనం వస్తున్నట్లు గమనించిన నిందితులు భయంతో ఆటోలోనే వేగంగా పరారయ్యారు. సమాచారం అందుకున్న వెంటనే సంగారెడ్డి డీఎస్పీ, సీఐ నేతృత్వంలో పోలీసులు సంఘటనా స్థలానికి చేరుకుని దర్యాప్తు ప్రారంభించారు.
కాలనీలోని సీసీటీవీ ఫుటేజీలను పరిశీలించగా, గ్రీన్ కలర్ ఎలక్ట్రిక్ ఆటోలో దుండగులు వచ్చినట్లు స్పష్టమైంది. ఆటో నంబర్ ప్లేట్ సరిగ్గా కనిపించకపోయినప్పటికీ, పోలీసులు టెక్నికల్ టీమ్ సహాయంతో ట్రేస్ చేసే ప్రయత్నం చేస్తున్నారు.
సాధారణంగా ఆటోలకు ఉండే ట్యాగ్ లైన్లు లేదా లోకల్ ఐడెంటిఫికేషన్ నంబర్ల ద్వారా ఆ వాహనం ఎవరిది? ఎక్కడి నుంచి వచ్చింది? అనే కోణంలో ఆరా తీస్తున్నారు. ఇప్పటికే మూడు ప్రత్యేక బృందాలు రంగంలోకి దిగి నిందితుల కోసం గాలిస్తున్నాయి.
మధ్యాహ్నం పూట కాలనీ నిర్మానుష్యంగా ఉంటుందని, పండుగ కావడంతో చాలా మంది ఊర్లకు వెళ్తారని ముందే తెలుసుకుని నిందితులు రెక్కీ నిర్వహించినట్లు పోలీసులు అనుమానిస్తున్నారు. ఆటోలో ఒకరు డ్రైవింగ్ సీటులో ఉండగా, మిగతా ఇద్దరు పిల్లలను ఎత్తుకెళ్లేలా పక్కా ప్లాన్ చేసుకుని వచ్చారు.
క్లోరోఫార్మ్ లేదా మత్తుమందు వంటి పదార్థాలను వాడేందుకు సిద్ధమయ్యారా అనే కోణంలో కూడా విచారణ జరుగుతోంది. లోకల్ ముఠా సభ్యులా లేక అంతర్రాష్ట్ర కిడ్నాపర్లా అన్నది తేలాల్సి ఉంది.
ఈ ఘటనతో బృందావన్ కాలనీ ప్రజలు తీవ్ర భయాందోళనకు గురవుతున్నారు. సెలవుల నేపథ్యంలో పిల్లలు బయట ఆడుకుంటున్నప్పుడు తల్లిదండ్రులు ఒక కన్ను వేసి ఉంచాలని పోలీసులు సూచిస్తున్నారు.
ఎండాకాలం సెలవులు ప్రారంభమవుతున్న తరుణంలో ఇలాంటి కిడ్నాప్ ముఠాలు చురుగ్గా ఉంటాయని, అపరిచితులు కనిపిస్తే వెంటనే సమాచారం అందించాలని కోరారు.
ఇళ్ల వద్ద సీసీ కెమెరాలు ఏర్పాటు చేసుకోవడం వల్ల ఇలాంటి నేరాలను అరికట్టవచ్చని సూచించారు. సాయంత్రం కల్లా నిందితులను పట్టుకుంటామని పోలీసులు ధీమా వ్యక్తం చేస్తున్నారు.
