తప్పతాగి డ్రైవింగ్.. అర్దరాత్రి బీభత్సం..
ఒకరు మృతి, 9 మందికి గాయాలు..
హైదరాబాద్ నగరంలో ఆదివారం అర్దరాత్రి ఓ వ్యక్తి మద్యం మత్తులో కారు నడుపుతూ బీభత్సం సృష్టించాడు. కేవలం గంట వ్యవధిలోనే ఆరు ప్రమాదాలకు కారణమయ్యాడు.అడొచ్చిన వ్యక్తులను, వాహనాలను కారుతో ఢీకొట్టాడు.
ఈ ఘటనలో ఒక పాదచారి మృతి చెందగా, మరో తొమ్మిది మంది గాయపడ్డారు. ఈ ఘటనకు పాల్పడిన వ్యక్తిని సాఫ్ట్వేర్ ఇంజనీర్గా పనిచేస్తున్న క్రాంతి కుమార్గా గుర్తించారు.
వివరాలు.. నిజాంపేటలో నివాసం ఉంటున్న నిందితుడు క్రాంతి కుమార్ సాఫ్ట్వేర్ ఇంజనీర్గా పనిచేస్తున్నాడు. ఆదివారం ఫుల్లుగా మద్యం తాగిన క్రాంతి కుమార్.. మద్యం మత్తులోనే కారులో ఇంటికి బయలుదేరాడు. కారులో ఐకియా రోటరీ వద్దకు చేరుకున్నాడు.
ఐకియా సమీపంలో ఆగి ఉన్న కారును ఢీకొట్టాడు. దీంతో కారులో ఉన్న మహిళ స్వల్పంగా గాయపడ్డారు. అనంతరం గచ్చిబౌలి బాబూఖాన్ లేన్ దగ్గర బైక్ను ఢీకొట్టగా ఒకరి కాలు విరిగింది. అక్కడి నుంచి వెళ్తూ పిస్తా హౌజ్ వద్ద ఒక్క పాదాచారిని ఢీకొట్టగా అతడు అక్కడికక్కడే మరణించాడు.
అయినప్పటికీ క్రాంతి కుమార్ తన కారుతో ముందకే వెళ్లాడు. ఆ తర్వాత కూడా ముందుకు వెళ్లి ఒక ఆటోను, రెండు బైక్లను కూడా ఢీకొట్టాడు. ఆటోను ఢీకొట్టిన ముగ్గురు గాయపడిన, రెండు బైక్లను ఢీకొట్టిన ఘటనలో నలుగురు గాయపడ్డారు.
అయితే ఆ తర్వాత కారు టైర్ పేలి ఆగిపోయింది. ఈ ఘటనపై సమాచారం అందుకున్న పోలీసులు అక్కడికి చేరకుని క్రాంతి కుమార్ను అదుపులోకి తీసుకున్నారు. అతనికి డ్రంక్ అండ్ డ్రైవ్ పరీక్షల చేయగా.. బ్లడ్ ఆల్కహాల్ కంటెంట్ 550 ఉన్నట్టుగా తేలింది. ఈ ఘటనకు సంబంధించి కేసు నమోదు చేసిన పోలీసులు దర్యాప్తు చేస్తున్నారు.
ఇలా దాదాపు గంట వ్యవధిలోనే క్రాంతి కుమార్ ఆరు ప్రమాదాలకు కారణమయ్యాడు. ఒక కారు, మూడు బైక్లు, ఒక ఆటోను ధ్వంసం చేశాడు. ఓ వ్యక్తి ప్రాణాలు పోవడంతో పాటు, మొత్తంగా 9 మంది గాయపడ్డారు.
ఈ ఘటనలో మరణించిన వ్యక్తిని ఇంకా గుర్తించాల్సి ఉంది. అయితే ఆటోలో ఉన్న ముగ్గురికి తీవ్ర గాయాలయ్యాయి. అయితే మద్యం మత్తులోనే ఈ ప్రమాదం జరిగిందని.. క్రాంతి కుమార్ మద్యం మత్తులో కారు నడుపుతూ తాను వెళ్లాల్సిన కూకట్పల్లి వైపు వెళ్లకుండా బయోడైవర్సిటీ జంక్షన్ వైపు వెళ్లాడని పోలీసులు తెలిపారు.
