ఖమ్మం కాంగ్రెస్ ప్రచారానికి హీరో వెంకటేశ్ ! డేట్ ఫిక్స్?
టాలీవుడ్ స్టార్ హీరో వెంకటేష్ ఎన్నికల ప్రచారానికి డేట్ ఫిక్స్ అయింది. ఖమ్మం కాంగ్రెస్ అభ్యర్థి రఘురాం రెడ్డి వియ్యంకుడైన వెంకటేష్.. ఎన్నికల ప్రచారానికి సిద్ధమయ్యారు.రఘురాం రెడ్డి మరో వియ్యంకుడు మంత్రి పొంగులేటి కూడా రంగంలోకి దిగనుండడంతో ఖమ్మం జిల్లాలో వియ్యాలవారి ప్రచారాలు ఇంట్రస్టింగ్‌గా మారాయి.
లోక్‌సభ ఎన్నికల హీట్‌ తెలంగాణలో రోజురోజుకూ పెరుగుతోంది. 13న పోలింగ్ జరగనుండగా.. అన్ని పార్టీలు ప్రచారంపై ఫుల్‌ ఫోకస్‌ పెట్టాయి. ఇప్పటికే బీజేపీ అగ్రనేతలతో పాటు రాష్ట్ర నేతలు రంగంలోకి దిగారు.
14 ఎంపీ సీట్లలో గెలుపే లక్ష్యంగా సీఎం రేవంత్ రెడ్డి రాష్ట్రవ్యాప్తంగా పర్యటిస్తున్నారు. కాంగ్రెస్ అగ్రనేతలు కూడా ఎంట్రీ ఇవ్వబోతున్నారు.ఇక హీరో వెంకటేష్ ఎన్నికల ప్రచారానికి కూడా డేట్ ఫిక్స్ అయింది.
ఖమ్మం కాంగ్రెస్ అభ్యర్థి రఘురాం రెడ్డి తరపున వెంకటేష్ ఎన్నికల ప్రచారం నిర్వహించనున్నారు. మే 7 నుంచి రఘురాం రెడ్డికి మద్దతుగా ప్రచారం చేయనున్నారు వెంకటేష్. రఘురాం రెడ్డికి హీరో వెంకటేష్, మంత్రి పొంగులేటి శ్రీనివాసరెడ్డిలు వియ్యంకులు.
వెంకటేష్ కుమార్తె ఆశ్రితను రఘురాం రెడ్డి పెద్దకొడుకు వినాయక్ రెడ్డి పెళ్లి చేసుకోగా, మంత్రి పొంగులేటి శ్రీనివాసరెడ్డి కుమార్తె స్వప్ని రెడ్డిని ఆయన చిన్న కుమారుడు అర్జున్ రెడ్డి వివాహం చేసుకున్నారు.
దీంతో రఘురాం రెడ్డి తరపున అటు హీరో వెంకటేష్, మంత్రి పొంగులేటి శ్రీనివాస్ రెడ్డి ప్రచారం చేయబోతున్నారు. వీరిద్దరి ప్రచారం మరింత కలిసి వస్తుందని రఘురాం రెడ్డి వర్గీయులు లెక్కలు వేస్తున్నారు.
ఖమ్మం ఎంపీ అభ్యర్థి విషయంలో అధిష్ఠానం తీవ్ర కసరత్తు చేసింది. ముగ్గురు మంత్రులు కుటుంబసభ్యుల టికెట్‌ కోసం ప్రయత్నించినప్పటికీ.. చివరికి రఘురాం రెడ్డికి టికెట్‌ కేటాయించింది. రఘురాం రెడ్డికి వియ్యంకుల ప్రచారం కలిసి వచ్చిందా లేదా అన్నది తేలాలంటే జూన్ 4 వరకు ఆగాల్సిందే.
