ఎమ్మెల్యే హరీష్ రావు క్యాంపు కార్యాలయంపై దాడి
సిద్దిపేటలో ఉద్రిక్తత పరిస్థితులు కొనసాగుతున్నాయి. గత అర్దరాత్రి సిద్దిపేటలో మాజీ మంత్రి, బీఆర్ఎస్ ఎమ్మెల్యే హరీష్ రావు క్యాంపు కార్యాలయంపై కొందరు వ్యక్తులు దాడి చేశారు.
అయితే ఈ పని చేసిందే కాంగ్రెస్ కార్యకర్తలేనని బీఆర్ఎస్ ఆరోపిస్తుంది. రైతు రుణమాఫీకి సంబంధించి సవాలు చేసిన హరీష్ రావు రాజీనామా చేయాలంటూ కాంగ్రెస్ శ్రేణులు శుక్రవారం రోజున సిద్దిపేటలో ఫ్లెక్సీలు ఏర్పాటు చేశారు.
మరోవైపు వాటిని తొలగించాలని బీఆర్ఎస్ శ్రేణులులో ఆందోళనకు దిగారు. దీంతో శుక్రవారం రాత్రి నుంచి సిద్దిపేటలో ఉద్రిక్తత పరిస్థితులు కొనసాగుతున్నాయి.
అయితే అర్దారత్రి సమయంలో కొందరు వ్యక్తులు సిద్దిపేట ఎమ్మెల్యే క్యాంపు కార్యాలయంపై దాడి చేశారు. హరీష్ రావు, బీఆర్ఎస్ ఫ్లెక్సీలను చించివేశారు. దీంతో సిద్దిపేటలో ఉద్రిక్తతలు మరింతగా పెరిగాయి.
ఈ ఘటనను హరీష్ రావు, కేటీఆర్, ఇతర బీఆర్ఎస్ నాయకులు తీవ్రంగా ఖండించారు. సిద్దిపేటలోని ఎమ్మెల్యే అధికారిక నివాసంపై కాంగ్రెస్ శ్రేణులు అర్దరాత్రి దాడిచేశాయని.. ఇది అన్యాయానికి నిదర్శనమని హరీష్ రావు ఎక్స్‌లో పేర్కొన్నారు.
తాళాలు పగులగొట్టి.. ఆస్తులు ధ్వంసం చేయడం అప్రజాస్వామికమని, ఆందోళన కలిగించే అంశం అని అన్నారు. ఈ దాడిని ఆపకుండా.. నిందితులకు పోలీసులే రక్షణ కల్పించినట్టుగా ఉందని ఆరోపించారు. ఎమ్మెల్యేకే భద్రత లేకపోతే.. పౌరులకు భరోసా ఏదని ప్రశ్నించారు. దాడి ఘటనపై డీజీపీ చర్యలు తీసుకోవాలని డిమాండ్‌ చేశారు.
ఇదిలాఉంటే, సిద్దిపేటలోని ఎమ్మెల్యే క్యాంపు కార్యాలయంపై దాడిపై బీఆర్ఎస్ శ్రేణులు ఆగ్రహం వ్యక్తం చేశాయి. శనివారం ఉదయం సిద్దిపేట ఎమ్మెల్యే క్యాంప్ కార్యాలయంపై దాడికి నిరసనగా సిద్దిపేటలో బీఆర్ఎస్ పార్టీ ఆధ్వర్యంలో భారీ నిరసన ర్యాలీ చేపట్టారు.
క్యాంప్ కార్యాలయం నుంచి అంబేద్కర్ సర్కిల్ వరకు నల్ల కండువాలు, నల్ల బ్యాడ్జ్‌లతో నిరసన వ్యక్తం చేశారు. అంబేద్కర్ సర్కిల్ వద్ద సీఎం రేవంత్ దిష్టిబొమ్మ దగ్ధం చేశారు.
అలాగే సీఎం రేవంత్ రెడ్డికి వ్యతిరేకంగా నినాదాలు చేశారు. పట్టణంలో కాంగ్రెస్ శ్రేణులు ఏర్పాటు చేసిన సీఎం రేవంత్ రెడ్డి ఫ్లెక్సీలను కూడా బీఆర్ఎస్ శ్రేణులు చించివేశారు. అయితే పోలీసులు వారిని అడ్డుకుని అదుపులోకి తీసుకున్నారు.
మరోవైపు హరీష్ రావు క్యాంపు కార్యాలయం ముట్టడికి కాంగ్రెస్ నాయకులు యత్నించగా.. వారిని కూడా పోలీసులు అదుపులోకి తీసుకుని పోలీసు స్టేషన్‌కు తరలించారు.
ఇక, ఈ పరిస్థితుల నేపథ్యంలో సిద్దిపేట పట్టణంలో పోలీసులు భారీగా మోహరించారు. ఎమ్మెల్యే క్యాంపు ఆఫీసు వద్ద భద్రతను కట్టుదిట్టం చేశారు. ప్రస్తుతం సిద్దిపేటలో ఉద్రిక్త పరిస్థితులు కొనసాగుతున్నాయి.
