గ్రూప్-2 పరీక్షల షెడ్యూల్ విడుదల
తెలంగాణలో గ్రూప్-2 పరీక్షల షెడ్యూల్ ను టీఎస్పీఎస్సీ కొద్ది సేపటి క్రితం విడుదల చేసింది. డిసెంబర్ 15, 16 తేదీల్లో ఈ పరీక్షను నిర్వహించనున్నట్లు తెలిపింది. ఉదయం, సాయంత్రం రెండు సెషన్లలో ఈ పరీక్ష ఉంటుంది.
ఆయా తేదీల్లో ఉదయం 10 గంటల నుంచి మధ్యాహ్నం 12.30 గంటల వరకు ఫస్ట్ సెషన్, మధ్యాహ్నం 3 గంటల నుంచి సాయంత్రం 5.30 గంటల వరకు సెకండ్ సెషన్ ఉంటుంది. తొలి రోజు అంటే డిసెంబర్ 15న.. పేపర్-1, పేపర్-2 పరీక్షలను, మరుసటి రోజు డిసెంబర్ 16న పేపర్-3, 4 పరీక్షలను నిర్వహించనున్నట్లు టీఎస్పీఎస్సీ వెబ్ నోట్లో పేర్కొంది.
మొత్తం 783 గ్రూప్-2 ఉద్యోగాల భర్తీకి 2022 డిసెంబర్ 29న టీఎస్పీఎస్సీ నోటిఫికేషన్ విడుదల చేసింది. మొత్తం 5.51 లక్షల మంది అభ్యర్థులు ఈ ఉద్యోగాలకు దరఖాస్తు చేస్తుకున్నారు.
అయితే.. పేపర్ లీకేజీ, ఎన్నికలు తదితర కారణాలతో ఈ పరీక్ష వాయిదా పడుతూ వస్తోంది. అనంతరం ఈ నెల 7,8 తేదీల్లో ఈ పరీక్షను నిర్వహించాలని టీఎస్పీఎస్సీ భావించింది.
ఇందుకు సంబంధించిన షెడ్యూల్ ను సైతం విడుదల చేసింది. అయితే.. డీఎస్సీ పరీక్షల నేపథ్యంలో ఈ ఎగ్జామ్స్ ను వాయిదా వేయాలని అభ్యర్థులు ఆందోళనలు చేశారు. దీంతో ప్రభుత్వం ఈ పరీక్షలను వాయిదా వేస్తూ నిర్ణయం తీసుకుంది. ఈ నేపథ్యంలో తాజాగా ఈ పరీక్షల తేదీలను విడుదల చేసింది టీఎస్పీఎస్సీ.
