ఇన్ఫోసిస్ అదిరిపోయే శుభవార్త.. 20 వేల నియామకాలు.. వేతనాల పెంపు, బోనస్‌పైనా ప్రకటన.!!
Infosys Attrition Rate: భారతీయ ఐటీ రంగంలో నియామకాలు.. వేతన పెంపుదలపై.. ఎన్నో సందేహాలు నెలకొన్న తరుణంలో దేశంలోనే రెండో అతిపెద్ద ఐటీ సంస్థ ఇన్ఫోసిస్ నుంచి శుభవార్త అందింది.
తాజాగా విడుదల చేసిన ప్రస్తుత ఆర్థిక సంవత్సరం తొలి త్రైమాసిక ఫలితాల సమయంలో కీలక ప్రకటన చేసింది. కంపెనీ ఉన్నతాధికారులు.. ఉద్యోగ నియామకాలు, వేతనాల పెంపుదల, బోనస్‌లపై కీలక ప్రకటనలు చేశారు. ఈ త్రైమాసికంలో ఉద్యోగులకు ‘అధిక’ వేరియబుల్ పే (బోనస్) చెల్లించినట్లు, భవిష్యత్తులో నియామకాలు కొనసాగుతాయని కంపెనీ చీఫ్ ఫైనాన్షియల్ ఆఫీసర్ (CFO) జయేష్ సంఘరాజ్‌కా బుధవారం తెలిపారు.
ఈ పరిణామాలు ఐటీ ఉద్యోగార్థులకు.. కంపెనీలోని ప్రస్తుత ఉద్యోగులకు ఆశల్ని రేకెత్తించగా, అట్రిషన్ రేటు (ఉద్యోగం వదిలి వెళ్లే వారి సంఖ్య) పెరుగుదల మాత్రం కొంత ఆందోళన కలిగిస్తోంది. వేతనాల పెంపుపై కీలక ప్రకటన చేసిన ఇన్ఫోసిస్.. గతేడాది వేతనాల పెంపు ఆలస్యం కాగా.. దానిని ఈ ఏడాదిలో విడుదల చేసినట్లు వెల్లడించింది. 2025 జనవరి నుంచి మొదటి దశ వేతన పెంపు అమల్లోకి వచ్చిందని.. ఇదే సమయంలో 2025, ఏప్రిల్ 1 నుంచి రెండో విడత అమలైందని స్పష్టం చేసింది.
అయితే తదుపరి వేతనాల పెంపుపై ఇంకా నిర్ణయం తీసుకోలేదని కంపెనీ ఉన్నతాధికారి సీఎఫ్ఓ సంఘరాజ్‌కా వెల్లడించారు. ఈ క్రమంలోనే ప్రస్తుత త్రైమాసికంలో ఉద్యోగులకు ‘అధిక’ వేరియబుల్ పే చెల్లించినట్లు తెలిపారు. టీసీఎస్ కూడా దాదాపు 70 శాతం మంది జూనియర్లకు 100 శాతం వేరియబుల్ పే చెల్లించిన సంగతి తెలిసిందే. ఇప్పుడు ఇన్ఫోసిస్ కూడా ఇదే బాటలో గుడ్‌న్యూస్ చెప్పింది.
పెరిగిన అట్రిషన్ రేటు..
జూన్ 2025లో స్వచ్ఛందంగా ఉద్యోగం వదిలి వెళ్లే వారి రేటు (సిబ్బంది వలసల రేటు) 14.4 శాతానికి పెరిగింది. ఇదే ఆందోళన కలిగిస్తోంది. ఇక్కడ ఇతర ప్రత్యర్థి కంపెనీల్లోకి వెళ్తున్నారన్నమాట. 2025 జూన్ 30 నాటికి కంపెనీలో మొత్తం ఉద్యోగుల సంఖ్య 3,23,788 గా ఉంది. అంతకుముందు ఆర్థిక సంవత్సరం ఇదే సమయంతో పోలిస్తే ఉద్యోగుల సంఖ్య 8 వేలకుపైగా పెరిగింది. ప్రస్తుత ఏప్రిల్- జూన్ త్రైమాసికంలో కంపెనీ నికర లాభం 9 శాతం పెరిగి రూ. 6,921 కోట్లకు చేరుకుంది.
20 వేల నియామకాలు..
ఇక్కడ ఇన్ఫోసిస్ చెప్పిన శుభవార్త ఏంటంటే.. ప్రస్తుత ఆర్థిక సంవత్సరంలో కంపెనీ 20 వేల మంది ఫ్రెషర్లను (తాజా ఉత్తీర్ణులు) నియమించుకోనున్నట్లు వెల్లడించింది.
“మీరు మా నియామకాల సంఖ్యలను చూస్తే, మా మొత్తం ఉద్యోగుల సంఖ్య ఈ సమయంలో స్థిరంగా ఉంది. ఇంకా మా వినియోగం 85 శాతం వద్ద గరిష్ట స్థాయికి చేరుకుంది.
కాబట్టి, మేము నియామకాలు కొనసాగిస్తాము. సంవత్సరం ప్రారంభంలో మేము ప్రకటించిన దానికి అనుగుణంగా నియామకాలు కొనసాగిస్తామని మేము ఆశిస్తున్నాం.” అని జయేష్ సంఘరాజ్‌కా అన్నారు.
