ఖమ్మంలో ఘోర విషాదం.. కడుపున పుట్టిన బిడ్డ తల్లిదండ్రుల కళ్ల ముందే ..
కుటుంబంతో కలిసి సరదాగా గడిపి ఇంటికి తిరిగి వెళ్తున్న ఆ దంపతులకు ఊహించని విషాదం ఎదురైంది. ట్రాఫిక్ సిగ్నల్ వద్ద జరిగిన ప్రమాదం వారి జీవితాల్లో తీరని చీకటిని నింపింది.
కళ్ల ముందే ముద్దుల కుమార్తె ప్రాణాలు కోల్పోవడంతో ఆ తల్లిదండ్రుల వేదనకు అంతులేకుండా పోయింది. అప్పటివరకు తమతో ఉన్న చిన్నారి ఇక లేదన్న నిజాన్ని తట్టుకోలేక వారు కన్నీరుమున్నీరయ్యారు. ఖమ్మం నగరంలోని ఎన్టీఆర్ కూడలి వద్ద గురువారం రాత్రి జరిగిన ఈ ప్రమాదం స్థానికంగా తీవ్ర విషాదాన్ని నింపింది.
ఇంటికి వెళ్తుండగా మృత్యువు రూపంలో లారీ… కల్లూరు మండలం ఎర్రబోయినపల్లికి చెందిన జెట్టి అశోక్, సంధ్య దంపతులు తమ మూడేళ్ల కుమార్తె నిషితతో కలిసి బైక్‌పై ఖమ్మం వచ్చారు. తిరుగు ప్రయాణంలో ఎన్టీఆర్ కూడలి వద్ద ట్రాఫిక్ సిగ్నల్ పడటంతో బైక్‌ను నిలిపారు. సిగ్నల్ మారడంతో ముందుకు కదిలారు. అదే సమయంలో వెనుక నుంచి వచ్చిన లారీ వారి బైక్‌ను పక్క నుంచి ఢీకొట్టింది.
తల్లి ఒడిలో నుంచి రోడ్డుపైకి.. ప్రమాద తీవ్రతకు చిన్నారి నిషిత తల్లి ఒడిలో నుంచి జారి రోడ్డుపై పడిపోయింది. దురదృష్టవశాత్తూ లారీ చిన్నారిపై నుంచి వెళ్లడంతో తీవ్ర గాయాలపాలై అక్కడికక్కడే మరణించింది. క్షణాల వ్యవధిలో జరిగిన ఈ ప్రమాదం ఆ కుటుంబాన్ని శోకసంద్రంలో ముంచింది.
గుండెలవిసేలా రోదించిన తల్లిదండ్రులు.. తమ గారాలపట్టి ప్రాణాలు కోల్పోవడంతో అశోక్, సంధ్య దంపతులు కన్నీటిపర్యంతమయ్యారు. చిన్నారిని చేతుల్లోకి తీసుకుని విలపించిన తల్లిదండ్రులను చూసి అక్కడున్నవారు చలించిపోయారు. అప్పటివరకు తమతో ఉన్న బిడ్డ ఒక్కసారిగా దూరం కావడంతో ఆ తల్లిదండ్రుల రోదనలు పలువురిని కంటతడి పెట్టించాయి.
పోలీసుల దర్యాప్తు ఈ ఘటనపై ఖమ్మం టూటౌన్ పోలీసులు కేసు నమోదు చేశారు. ప్రమాదానికి సంబంధించిన వివరాలను సేకరించి దర్యాప్తు చేపట్టినట్లు ఇన్‌స్పెక్టర్ రామకృష్ణ వెల్లడించారు. మూడేళ్ల చిన్నారి మృతితో కుటుంబ సభ్యులు, స్వగ్రామంలో విషాదం నెలకొంది.