టిఫిన్ సెంటర్లలో ధరల పెంపు
సామాన్య ప్రజలపై అదనపు భారం
రూ.30 నుంచి రూ.40కు ప్లేట్ టిఫిన్
సామాన్యుల కష్టాలు పెరుగుతున్నాయా?
సికే న్యూస్ ప్రతినిధి ఇస్లావత్ నరసింహ ఏన్కూరు మార్చి 15 2026: ఏన్కూరు మండలంలోని పలు టిఫిన్ సెంటర్లలో ఇటీవల టిఫిన్ ధరలను అనూహ్యంగా పెంచడం సామాన్య ప్రజల్లో ఆందోళనకు గురిచేస్తోంది. ఇంతకుముందు రూ.30కు అందిస్తున్న టిఫిన్ ప్లేటును ప్రస్తుతం రూ.40కు విక్రయిస్తున్నట్లు వినియోగదారులు చెబుతున్నారు. ఒక్కసారిగా రూ.10 పెంపు చేయడం వల్ల రోజువారీగా టిఫిన్పై ఆధారపడే కార్మికులు, ఆటో డ్రైవర్లు, విద్యార్థులు, చిన్న ఉద్యోగులు తీవ్ర ఇబ్బందులు ఎదుర్కొంటున్నారు.
టిఫిన్ సెంటర్ నిర్వాహకులు గ్యాస్ ధరలు పెరగడం, సరఫరాలో కొరత ఏర్పడడం వల్ల ఖర్చులు అధికమయ్యాయని చెబుతున్నారు. అంతర్జాతీయ పరిస్థితులు, ముఖ్యంగా యురాన్–ఇజ్రాయిల్ యుద్ధాల ప్రభావంతో గ్యాస్ సరఫరాలో అంతరాయం ఏర్పడిందని వారు వివరిస్తున్నారు. దీంతో వంట గ్యాస్ సిలిండర్ల లభ్యత తగ్గి, బ్లాక్ మార్కెట్లో ఎక్కువ ధరలకు కొనుగోలు చేయాల్సి వస్తోందని కూడా కొందరు నిర్వాహకులు పేర్కొంటున్నారు.
అయితే వినియోగదారుల అభిప్రాయం మాత్రం భిన్నంగా ఉంది. గ్యాస్ కొరతను కారణంగా చూపుతూ అధిక లాభాల కోసం ధరలు పెంచుతున్నారని వారు ఆరోపిస్తున్నారు. కొన్నిచోట్ల టిఫిన్ నాణ్యతలో మార్పులు లేకపోయినా ధరలు పెరగడం అన్యాయమని ప్రజలు అంటున్నారు. ముఖ్యంగా ఉదయం మరియు సాయంత్రం వేళల్లో టిఫిన్ సెంటర్ల వద్ద రద్దీ ఎక్కువగా ఉండటంతో ప్రజలకు ప్రత్యామ్నాయాలు కూడా లేవని చెబుతున్నారు.
ఇంకా కొందరు టిఫిన్ సెంటర్లు ధరల జాబితాను బహిరంగంగా ప్రదర్శించకుండా వినియోగదారుల నుంచి ఎక్కువ మొత్తాలు వసూలు చేస్తున్నారని సమాచారం. ధరల పెంపుపై ఎటువంటి అధికారిక నోటీసులు లేకపోవడం కూడా ప్రజల్లో సందేహాలకు దారితీస్తోంది. ఈ నేపథ్యంలో సంబంధిత అధికారులు తనిఖీలు నిర్వహించి వాస్తవ పరిస్థితిని తెలుసుకోవాలని స్థానికులు డిమాండ్ చేస్తున్నారు.
వ్యాపారులు మాత్రం పెరిగిన ముడి సరుకు ధరలు, వంట నూనె, పప్పులు, కూరగాయలు, గ్యాస్ వంటి అవసరమైన వస్తువుల ఖర్చులు పెరగడంతో తాము కూడా ఇబ్బందులు ఎదుర్కొంటున్నామని చెబుతున్నారు. ధరలు పెంచకపోతే వ్యాపారం నష్టాల్లోకి వెళ్లే పరిస్థితి ఉందని వారు అంటున్నారు.
ఈ సమస్యపై తక్షణమే చర్యలు తీసుకుని ధరలను నియంత్రించేందుకు అధికారులు ముందుకు రావాలని ప్రజలు కోరుతున్నారు.ధరల నియంత్రణ లేకపోతే రోజువారీ జీవన వ్యయాలు మరింత పెరిగి సామాన్య ప్రజలపై ఆర్థిక భారం అధికమయ్యే అవకాశముందని స్థానికులు ఆందోళన వ్యక్తం చేస్తున్నారు.
