సీఎం పీఏ అరెస్ట్…
రాజ్యసభ సభ్యురాలు స్వాతి మలివాల్‌పై దాడి కేసులో నిందితుడు, ఢిల్లీ సీఎం అరవింద్ కేజ్రీవాల్ సహాయకుడు బిభవ్ కుమార్‌ను ఢిల్లీ పోలీసులు శనివారం అరెస్ట్ చేశారు.
ముఖ్యమంత్రి కేజ్రీవాల్ నివాసం నుంచి ఢిల్లీ పోలీసు బృందం ఈరోజు మధ్యాహ్నం సమయంలో బిభవ్ కుమార్‌ను అదుపులోకి తీసుకుంది. అనంతరం బిభవమ్ కుమార్‌ను విచారణ నిమిత్తం అతడిని పోలీసు స్టేషన్‌కు తరలించారు.
ఇక, మే 13వ తేదీన సీఎం కేజ్రీవాల్ నివాసంలో బిభవ్ కుమార్ తనపై దాడి చేశాడని స్వాతి మలివాల్ ఆరోపించిన సంగతి తెలిసిందే. బిభవ్ కుమార్ తనను 5 నుంచి 7 సార్లు కొట్టారని, తనను దారుణంగా ఈడ్చారని, ఛాతీపై తన్నాడని ఆమె ఆరోపిస్తున్నారు.
అలాగే బిభవ్ కుమార్ తన చొక్కాను ఉద్దేశపూర్వకంగా పైకి లాగాడని కూడా స్వాతి మలివాల్ ఆరోపించారు. తనపై దాడి చేసిన తర్వాత కేజ్రీవాల్ నివాసం వెలుపలికి తీసుకెళ్లారని.. తీవ్ర నొప్పితో బాధపడుతున్న తాను అక్కడే నేలపై కొద్దిసేపు కూర్చున్నట్టుగా స్వాతి మలివాల్ చెప్పారు.
మరోవైపు ఈ కేసులో అరెస్ట్ అయిన బిభవ్ కుమార్ ముందస్తు బెయిల్ కోసం కోర్టును ఆశ్రయించాడు. తీస్ హజారీ కోర్టులో అడిషనల్ సెషన్స్ జడ్జి సుశీల్ అనుజ్ త్యాగి ముందు బిభవ్ కుమార్ పిటిషన్ లిస్ట్ చేయబడింది. బిభవ్ కుమార్ ముందస్తు బెయిల్ పిటిషన్ ఈరోజు విచారణకు రానుంది.
మరోవైపు బిభవ్ కుమార్ ఫిర్యాదు మేరకు కేసు నమోదు చేయాలని ఆప్ నాయకురాలు అతిషి ఢిల్లీ పోలీసులను కోరారు. మే 13న సీఎం కేజ్రీవాల్ నివాసం వద్ద స్వాతి మలివాల్ భద్రతా నియమావళిని ఉల్లంఘించారని.. దీని గురించి బిభవ్ కుమార్ ప్రశ్నించినప్పుడు దుర్భాషలాడడం మొదలుపెట్టారని ఆరోపించారు.
ఇక, ఈ వ్యవహారంపై ఆమ్ ఆద్మీ పార్టీ తన వైఖరిని స్పష్టం చేసింది. ఆప్ నాయకురాలు, ఢిల్లీ మంత్రి అతిషి శుక్రవారం సాయంత్రం విలేకరుల సమావేశంలో మాట్లాడుతూ.. స్వాతి మలివాల్ ఆరోపణలను నిరాధారమైనవిగా పేర్కొన్నారు.
ఢిల్లీ ముఖ్యమంత్రి అరవింద్ కేజ్రీవాల్‌ను ఇరికించేందుకు బీజేపీ చేసిన కుట్ర అని సంచలన ఆరోపణలు చేశారు. స్వాతి మలివాల్ అపాయింట్‌మెంట్ లేకుండానే కేజ్రీవాల్ నివాసానికి చేరుకున్నారని.. ఆమె (స్వాతి మలివాల్) ఉద్దేశ్యం అరవింద్ కేజ్రీవాల్‌పై ఆరోపణలు చేయడం అని అతిషి అన్నారు. ”స్వాతి మలివాల్ అరవింద్ కేజ్రీవాల్‌ను కలవాలని పట్టుబట్టారు.
అయితే కేజ్రీవాల్ సహాయకుడు బిభవ్ కుమార్ ఆమెతో సీఎం బిజీగా ఉన్నారని చెప్పారు. ఆమె అరుస్తూ లోపలికి దూసుకెళ్లేందుకు ప్రయత్నించింది. ఈ మొత్తం సంఘటన ఇది బీజేపీ కుట్ర అని రుజువు చేస్తుంది. కేజ్రీవాల్‌ను ఇరికించడానికి స్వాతి మలివాల్‌ను ముఖంగా మార్చారు” అని అతిషి ఆరోపించారు.
తనపై క్రూరమైన దాడి జరిగిందని స్వాతి మలివాల్ చేసిన వాదనలను అతిషి తోసిపుచ్చారు. స్వాతి మలివాల్‌కు సంబంధించి బయటకు వచ్చిన వీడియోలో ఆమె డ్రాయింగ్ రూమ్‌లో హాయిగా కూర్చున్నట్లు కనిపిస్తుందని.. ఇది పూర్తిగా భిన్నమైన వాస్తవాన్ని తెలియజేస్తుందని అతిషి పేర్కొన్నారు. ”వీడియోలో స్వాతి మలివాల్ డ్రాయింగ్ రూమ్‌లో హాయిగా కూర్చోవడం, సెక్యూరిటీ సిబ్బందిని బెదిరించడం చూడొచ్చు. ఆమె బట్టలు చిరిగిపోలేదు.
ఆమె బిభవ్ కుమార్‌ని బెదిరిస్తున్నట్లు కూడా వీడియోలో ఉంది. మలివాల్ చేసిన ఆరోపణలు నిరాధారమైనవి. కేజ్రీవాల్‌ను కలవాలని మలివాల్ పట్టుబట్టారు. ఆమె రాజ్యసభ ఎంపీ.. సీఎంకు బిజీ షెడ్యూల్ ఉందనే విషయం ఆమెకే తెలియాలి.
ముఖ్యమంత్రి బిజీగా ఉన్నారని, ఆమెను కలవలేకపోతున్నారని కుమార్ ఆమెకు చెప్పారు. ఆమె అతనిపై అరుస్తూ, అతన్ని తోసివేసి.. సీఎం హౌస్‌లోని నివాస భాగంలోకి ప్రవేశించడానికి ప్రయత్నించింది” అని అతిషి అన్నారు.
అయితే స్వాతి మలివాల్ ఘటనపై ఆప్ సీనియర్ నేత సంజయ్ సింగ్ స్పందిస్తూ.. బిభవ్ కుమార్ ఆమెతో అసభ్యంగా ప్రవర్తించాడని చెప్పిన సంగతి తెలిసిందే.
ఈ వ్యాఖ్యలపై అతిషిని ప్రశ్నించగా ఆమె స్పందిస్తూ.. ”ఆప్ ఎంపీ సంజయ్ సింగ్ స్వాతి మలివాల్‌ను కలిశాడు. అతని వద్ద ఆమె వెర్షన్ మాత్రమే ఉంది. అయితే ఇప్పుడు ఈ వీడియో నిజాన్ని బయటపెట్టింది” అని చెప్పారు.
