కేబుల్ బ్రిడ్జి పైనుంచి దూకి యువతి ఆత్మహత్య…
హైదరాబాద్ నగరంలోని దుర్గం చెరువులో దూకి యువతి ఆత్మహత్య చేసుకున్న ఘటన తీవ్ర కలకలం సృష్టించింది. మృతిచెందిన యువతిని సుష్మ(27)గా గుర్తించారు.
దీనికి సంబంధించి పూర్తి వివరాల్లోకి వెళితే … మాదాపూర్ పోలీసులు తెలిపిన వివరాల ప్రకారం ఈస్ట్ మారేడు పల్లికి చెందిన బి. సుష్మ (27) అనే మహిళ కనపడటం లేదని ఆమె తండ్రి ఈ రోజు ( జూన్ 19) తెల్లవారుజామున పోలీసులకు ఫిర్యాదు చేశారు.
ఆమె HITEC సిటీలోని డైబోల్డ్/నిక్స్డార్ఫ్లో పని చేస్తుంది. ప్రైవేట్ ఎంప్లాయిగా పనిచేస్తున్న ఆమె.. నిన్న ( జూన్ 18) మధ్యాహ్నం 3 గంటలకు ఆఫీసుకు వెళ్లింది.
రాత్రి 1 గంటలకు ఇంటికి రావలసిన సుష్మ రాకపోవండంతో .. ఆమె తండ్రి కంపెనీ మేనేజర్ ను సంప్రదించగా.. నిన్న ( జూన్ 18) రాత్రి 8:30 గంటలకే ఆఫీసు నుండి బయలుదేరిందని చెప్పారని ఫిర్యాదు చేసినట్లు పోలీసులు తెలిపారు.
సుష్మ తండ్రి అంజయ్య ఫిర్యాదు మేరకు పోలీసులు మిస్సింగ్ కేసు నమోదు చేసి దర్యాప్తు చేస్తున్నారు. ఈరోజు ( జూన్ 19) ఉదయం 7 గంటల ప్రాంతంలో దుర్గం చెరువులో ఓ మహిళ మృతదేహం తేలుతూ ఉందని పోలీసులకు సమాచారం అందింది.
ఘటనా స్థలానికి చేరుకున్న పోలీసులు, మృతదేహం అదృశ్యమైన సుష్మాదేనని గుర్తించారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు. మృతికి గల కారణాలు, ఇతర వివరాలు తెలియాల్సి ఉంది.
