ఫిర్యాదు చేసిన వెంటనే స్పందన.. విద్యుత్ తీగల సమస్యకు పరిష్కారం
ఏఈ ఉమాకాంత్ ఆదేశాలతో తక్షణ చర్యలు..
వర్షాల నేపథ్యంలో విద్యుత్ ప్రమాదాల పట్ల అప్రమత్తత అవసరం
సీకే న్యూస్‌ ఖమ్మం ప్రతినిధి ఇస్లావత్ నరసింహ నవంబర్ 02 2026: ఏన్కూరు మండల పరిధిలోని ప్రధాన సెంటర్‌లో కిందకు వేలాడుతున్న విద్యుత్ తీగల సమస్యపై విద్యుత్ శాఖ అధికారులు తక్షణమే స్పందించి పరిష్కారం చూపించారు. విద్యుత్ తీగలు కిందకు వేలాడుతుండటంతో దుకాణదారులు, అటుగా రాకపోకలు సాగించే ప్రజలకు ప్రమాదం పొంచి ఉందని గుర్తించిన స్థానిక దుకాణదారులు సంబంధిత అధికారుల దృష్టికి సమస్యను తీసుకెళ్లారు.
దీనిపై స్పందించిన ఏఈ ఉమాకాంత్ వెంటనే సమస్యను పరిష్కరించాలని ఆదేశించారు. ఆయన ఆదేశాల మేరకు శ్రీను, రమేష్, వేణు ఆధ్వర్యంలో విద్యుత్ సిబ్బంది తక్షణ చర్యలు చేపట్టి పనులను త్వరితగతిన పూర్తి చేశారు. దీంతో కిందకు వేలాడుతున్న విద్యుత్ తీగల సమస్యకు పరిష్కారం లభించింది.
స్థానికంగా కోతుల బెడద ఎక్కువగా ఉండటంతో అవి విద్యుత్ తీగలపై వేలాడుతూ వెళ్లడం వల్ల తీగలు సాగి కిందకు వచ్చినట్లు స్థానికులు తెలిపారు. సమస్యను గుర్తించిన వెంటనే అధికారులు స్పందించి చర్యలు చేపట్టడంతో దుకాణదారులు హర్షం వ్యక్తం చేశారు.
వర్షాల నేపథ్యంలో అప్రమత్తత అవసరం
ప్రస్తుతం వర్షాలు కురుస్తున్న నేపథ్యంలో ప్రజలు విద్యుత్ ప్రమాదాల పట్ల అప్రమత్తంగా ఉండాలని సూచిస్తున్నారు. తడిగా ఉన్న విద్యుత్ స్తంభాలు, తెగిపడిన తీగలు, కిందకు వేలాడుతున్న విద్యుత్ వైర్లకు దూరంగా ఉండాలి.
వర్షపు నీరు నిలిచిన ప్రాంతాల్లో విద్యుత్ స్తంభాలు, తీగల సమీపంలో జాగ్రత్తగా వ్యవహరించాలి. ఎక్కడైనా విద్యుత్ తీగలు తెగిపడినా, కిందకు వేలాడుతున్నా వాటిని తాకకుండా వెంటనే సంబంధిత విద్యుత్ శాఖ అధికారులకు సమాచారం అందించాలి. సొంతంగా తీగలను సరిచేసేందుకు ప్రయత్నించకూడదు.
విద్యుత్ ప్రమాదాల నివారణకు ప్రజలు అప్రమత్తంగా ఉండటంతోపాటు, సమస్యలు గుర్తించిన వెంటనే అధికారులకు తెలియజేయాలని సూచిస్తున్నారు. ఏన్కూరు ప్రధాన సెంటర్‌లో విద్యుత్ తీగల సమస్యపై సత్వరమే స్పందించి పరిష్కరించిన ఏఈ ఉమాకాంత్‌తో పాటు విద్యుత్ సిబ్బందిని స్థానిక దుకాణదారులు అభినందించారు.
