ఏన్కూరు ప్రధాన కూడలిలో ట్రాఫిక్ కష్టాలు..
లారీ సెల్ఫ్ ఆగిపోవడంతో నిలిచిన వాహనాలు
ఇబ్బందులు ఎదుర్కొన్న వాహనదారులు, ప్రయాణికులు
ట్రాఫిక్ నియంత్రణకు పోలీసుల నియామకం ఎప్పుడు?
సీకే న్యూస్‌ ఖమ్మం ప్రతినిధి ఇస్లావత్ నరసింహ నవంబర్ 14 2026: మండల కేంద్రంలోని ప్రధాన కూడలిలో లారీ సాంకేతిక సమస్యతో నిలిచిపోవడంతో భారీగా ట్రాఫిక్ జామ్ ఏర్పడింది. ప్రధాన రహదారిపై లారీ నిలిచిపోవడంతో అటు ఇటుగా వెళ్లే వాహనాల రాకపోకలకు తీవ్ర అంతరాయం కలిగింది. దీంతో రహదారికి ఇరువైపులా వాహనాలు బారులు తీరాయి. ద్విచక్ర వాహనదారులు, ఆటోలు, కార్లు, ఇతర భారీ వాహనాల ప్రయాణికులు కొంతసేపు తీవ్ర ఇబ్బందులు ఎదుర్కొన్నారు.
నిత్యం రద్దీగా ఉండే ఏన్కూరు ప్రధాన కూడలిలో ట్రాఫిక్ నియంత్రణకు పోలీసుల పర్యవేక్షణ లేకపోవడం సమస్యను మరింత తీవ్రతరం చేస్తోంది. ప్రధాన కూడలిలో ట్రాఫిక్ పోలీసులు అందుబాటులో లేకపోవడంతో వాహనాల రాకపోకలను క్రమబద్ధీకరించే వారు లేక వాహనదారులు తమకు అనుకూలంగా ముందుకు వెళ్లేందుకు ప్రయత్నిస్తున్నారు. దీంతో తరచూ ట్రాఫిక్ సమస్యలు తలెత్తుతున్నాయని స్థానికులు పేర్కొంటున్నారు.
ఏన్కూరు మండల కేంద్రం మీదుగా వివిధ గ్రామాలకు, మండలాలకు నిత్యం వందలాది వాహనాలు రాకపోకలు సాగిస్తుంటాయి. ముఖ్యంగా కార్యాలయాలు, విద్యాసంస్థలు, వ్యాపార సముదాయాలు ఉన్న ప్రధాన కూడలిలో ఉదయం, సాయంత్రం వేళల్లో వాహనాల రద్దీ అధికంగా ఉంటుంది. ఇలాంటి సమయంలో చిన్నపాటి సాంకేతిక సమస్యతో వాహనం రహదారిపై నిలిచిపోయినా ట్రాఫిక్ మొత్తం స్తంభించే పరిస్థితి నెలకొంటోంది.
ప్రధాన కూడలిలో శాశ్వతంగా ట్రాఫిక్ నియంత్రణ చర్యలు చేపట్టడంతో పాటు రద్దీ సమయాల్లో ట్రాఫిక్ పోలీసులను నియమించాలని ప్రజలు కోరుతున్నారు. అత్యవసర వైద్య సేవలకు వెళ్లే అంబులెన్సులు, ఇతర అత్యవసర వాహనాలకు సైతం ట్రాఫిక్ అంతరాయం కలగకుండా అధికారులు తగిన చర్యలు తీసుకోవాలని విజ్ఞప్తి చేస్తున్నారు.
ఇప్పటికైనా సంబంధిత పోలీసు శాఖ ఉన్నతాధికారులు స్పందించి ఏన్కూరు ప్రధాన కూడలిలో ట్రాఫిక్ నియంత్రణకు ప్రత్యేక చర్యలు చేపట్టి, వాహనదారుల ఇబ్బందులను తొలగించాలని మండల ప్రజలు కోరుతున్నారు.
