తెలంగాణ కాంట్రాక్ట్, అవుట్సోర్సింగ్ ఉద్యోగులకు బంపర్ ఆఫర్
Web desc : రాష్ట్రంలోని ప్రభుత్వ విభాగాలలో పనిచేస్తున్న తాత్కాలిక, పొరుగుసేవల సిబ్బందికి తెలంగాణ సర్కార్ అదిరిపోయే శుభవార్త చెప్పింది. ఉద్యోగుల సంక్షేమానికి పెద్దపీట వేస్తూ.. గతంలో ఎదురవుతున్న వేతనాల జాప్యానికి స్వస్తి పలకాలని సీఎం రేవంత్ రెడ్డి నేతృత్వంలోని ప్రభుత్వం ఈ కీలక అడుగు వేసింది. దీనివల్ల వేల కుటుంబాలకు పెద్ద ఉపశమనం లభించనుంది.
ఆరోగ్య శాఖలో సరికొత్త విప్లవం. ఈ కొత్త విధానంలో భాగంగా ప్రభుత్వం చరిత్రలో తొలిసారిగా ఒక విప్లవాత్మక మార్పును తీసుకొచ్చింది. కాంట్రాక్ట్, అవుట్సోర్సింగ్, గౌరవ వేతనం ప్రాతిపదికన పనిచేసే సిబ్బంది వేతనాలను ఎలాంటి థర్డ్ పార్టీ ప్రమేయం లేకుండా డైరెక్ట్ బెనిఫిట్ ట్రాన్స్ఫర్ (DBT) పద్ధతి ద్వారా నేరుగా వారి బ్యాంకు ఖాతాల్లోనే జమ చేస్తున్నారు.
ఈ పద్ధతి వల్ల వేతనాల చెల్లింపు ప్రక్రియలో పూర్తి స్థాయి పారదర్శకత, జవాబుదారీతనం పెరగడమే కాకుండా, మధ్యవర్తుల కమిషన్ల దందాకు, అనవసర ఆలస్యానికి పూర్తిగా చెక్ పడినట్లయింది.మొదటి తారీఖున పడనున్న జీతం డబ్బులు
ఆరోగ్య శాఖ పరిధిలోని ఉద్యోగులకు ఈ నెల నుంచే (జులై 1వ తేదీ నుంచే) ఒకటో తారీఖున జీతాలు ఇచ్చే ప్రక్రియను ప్రభుత్వం అధికారికంగా ప్రారంభించింది. గతంలో నెలల తరబడి జీతాలు రాక ఇబ్బంది పడిన సిబ్బందికి, ఈసారి రెగ్యులర్ ప్రభుత్వ ఉద్యోగులతో పాటే ఒకటో తేదీనే మెజారిటీ అకౌంట్లలో నగదు జమ కావడంతో వారి ఆనందానికి అవధులు లేకుండా పోయాయి. ఇప్పటికే అత్యధిక శాతం మంది ఉద్యోగుల మొబైల్స్కు శాలరీ క్రెడిట్ అయినట్లు మెసేజ్లు వచ్చాయి.
టీవీవీపీ పరిధిలోని 1,700 మంది ఉద్యోగుల అలర్ట్
అయితే, తెలంగాణ వైద్య విధాన పరిషత్ (TVVP) పరిధిలో పనిచేస్తున్న సుమారు 1,700 మంది కాంట్రాక్ట్, అవుట్సోర్సింగ్ సిబ్బందికి మాత్రం కొత్తగా డీబీటీ విధానాన్ని అనుసంధానం చేయడం వల్ల కొన్ని స్వల్ప సాంకేతిక సమస్యలు తలెత్తాయి.
దీనివల్ల ఒకటో తేదీన అందాల్సిన వేతనాల్లో స్వల్ప జాప్యం జరిగింది. ఈ విషయాన్ని గమనించిన అధికారులు తక్షణమే స్పందించి యుద్ధప్రాతిపదికన సాంకేతిక లోపాలను సరిచేశారు.
వీరికి సంబంధించిన బిల్లులకు ఆర్థిక శాఖ ఇప్పటికే పూర్తి స్థాయిలో ఆమోదం తెలపడంతో, సోమవారం (జులై 6) నాటికి ఈ 1,700 మంది ఖాతాల్లో కూడా డబ్బులు ఠంఛనుగా జమ కానున్నాయి. ప్రభుత్వ నిర్ణయం పట్ల రాష్ట్రవ్యాప్తంగా ఉన్న కార్మిక సంఘాలు, ఉద్యోగులు హర్షం వ్యక్తం చేస్తున్నారు.
