భద్రాద్రిలో తల్లీబిడ్డ మృతి ఘటనలో ట్విస్ట్.. శ్మశానంలో బయటపడ్డ సర్జికల్ కత్తెర!
Web desc : వైద్యుల నిర్లక్ష్యానికి రెండు నిండు ప్రాణాలు బలైపోయాయి. పురిటి నొప్పులతో ఆసుపత్రికి వస్తే.. వైద్యం చేయాల్సిన డాక్టర్ల నిర్లక్ష్యం, ఓ తల్లిని, కడుపులోని పసికందును నిలువునా బలితీసుకుంది.
భద్రాద్రి కొత్తగూడెం జిల్లాలో వెలుగుచూసిన ఈ ఘటన స్థానికంగా కలకల రేపుతోంది. గుండాల మండలం శెంబులగూడెం గ్రామానికి చెందిన 25 ఏళ్ల చాట్ల వనిజ గర్భిణీ. ప్రసవం కోసం ఆమెను కుటుంబ సభ్యులు గుండాల ప్రభుత్వ ఆసుపత్రిలో చేర్చారు.
అయితే, ఆ సమయంలో అక్కడ డ్యూటీలో ఉండాల్సిన వైద్యులు అందుబాటులో లేరనే ఆరోపణలు వెల్లువెత్తుతున్నాయి. డాక్టర్లు లేకపోవడంతో అక్కడే ఉన్న నర్సు వనిజకు ప్రసవం చేసింది. కానీ, తీవ్ర వికటించడంతో పురిటిలోనే ఆ పసికందు కన్నుమూసింది.
అంతటితో ఆగకుండా, ప్రసవం తర్వాత వనిజకు తీవ్ర రక్తస్రావం కావడం మొదలైంది. పరిస్థితి విషమించడంతో ఆమెను అత్యవసరంగా ఖమ్మం ప్రభుత్వ ఆసుపత్రికి తరలించారు.
అక్కడ చికిత్స పొందుతూ వనిజ కూడా ప్రాణాలు విడిచింది. నమ్ముకున్న ఆసుపత్రే.. ఆ తల్లిని, బిడ్డను పొట్టనబెట్టుకోవడంతో కుటుంబ సభ్యులు కన్నీరుమున్నీరుగా విలపించారు. అంత్యక్రియలు కూడా ముగిసిపోయాయి.
అయితే వనిజ అంత్యక్రియలు ముగిసిన తర్వాత.. చితాభస్మం సేకరిస్తున్న సమయంలో బూడిదలో ఓ కత్తెర లభ్యమయింది. గర్భవతికి ఆపరేషన్ లేదా ప్రసవ సమయాల్లో వాడే సర్జికల్ కత్తెర శ్మశానంలో కాలిపోయిన శవంలో బయటపడటం పలు అనుమానాలకు తావిస్తోంది.
ప్రసవం సమయంలో వైద్య సిబ్బంది నిర్లక్ష్యంగా కత్తెరెను వనిజ కడుపులోనే మర్చిపోయి ఉంటారనే అనుమానాలు వ్యక్తమవుతున్నాయి. ఆ కత్తెర వల్లే అంతలా రక్తస్రావం జరిగి వనిజ చనిపోయిందా అనే ప్రశ్నలు తలెత్తుతున్నాయి.
ఈ దారుణంపై మృతురాలి కుటుంబ సభ్యులు, గ్రామస్థులు తీవ్ర ఆగ్రహం వ్యక్తం చేస్తున్నారు. వైద్యుల నిర్లక్ష్యంపై తక్షణమే ఉన్నతాధికారులు స్పందించి, సమగ్ర విచారణ జరిపించాలని డిమాండ్ చేస్తున్నారు. తమకు న్యాయం జరిగే వరకు వదిలిపెట్టేది లేదని బాధితులు హెచ్చరిస్తున్నారు.
