ఏన్కూరు పోలీస్ స్టేషన్లో ప్రెస్ నోట్లు కరువు
అధికారిక సమాచారం అందక వార్తల సేకరణలో ఇబ్బందులు..
క్రమం తప్పకుండా వివరాలు వెల్లడించాలని జర్నలిస్టుల విజ్ఞప్తి
CK న్యూస్ ప్రతినిధి ఇస్లావత్ నరసింహ ఏన్కూరు జూలై 19 2026: ఏన్కూరు పోలీస్ స్టేషన్ పరిధిలో నమోదవుతున్న పలు కేసులు, పోలీస్ శాఖ చేపడుతున్న చర్యలకు సంబంధించిన అధికారిక ప్రెస్ నోట్లు ఇటీవల కాలంలో మీడియాకు క్రమం తప్పకుండా విడుదల కావడం లేదని జర్నలిస్టులు పేర్కొంటున్నారు.
ప్రజలకు చేరాల్సిన సమాచారం అధికారికంగా పోలీస్ శాఖ ద్వారానే అందితే వాస్తవాలను స్పష్టంగా తెలియజేసే అవకాశం ఉంటుందని, అయితే ప్రెస్ నోట్లు లేకపోవడంతో వార్తల సేకరణలో ఇబ్బందులు ఎదురవుతున్నాయని మీడియా ప్రతినిధులు అంటున్నారు.
పోలీస్ శాఖ ప్రజలకు, మీడియాకు మధ్య వారధిగా వ్యవహరిస్తుందని గుర్తు చేస్తూ, చట్టపరమైన పరిమితులకు లోబడి వెల్లడించవచ్చిన కేసులు, తనిఖీలు, ప్రత్యేక చర్యలు, నేరాల నియంత్రణ కార్యక్రమాలకు సంబంధించిన వివరాలను ఎప్పటికప్పుడు ప్రెస్ నోట్ రూపంలో విడుదల చేయాలని వారు కోరుతున్నారు.
అధికారిక సమాచారం సకాలంలో అందుబాటులో ఉంటే ప్రజలకు ఖచ్చితమైన సమాచారం చేరడంతో పాటు అపోహలకు కూడా తావు ఉండదని జర్నలిస్టులు అభిప్రాయపడుతున్నారు. గతంలో మాదిరిగానే ఏన్కూరు పోలీస్ స్టేషన్ నుంచి అన్ని ముఖ్యమైన అంశాలపై క్రమం తప్పకుండా ప్రెస్ నోట్లు విడుదల చేయాలని మీడియా ప్రతినిధులు విజ్ఞప్తి చేస్తున్నారు.
