కాసుల వంతెన… నెలలకే కుంగిన రహదారి
ప్రజాధనంతో నిర్మాణం.. ప్రజలకే ప్రమాదమా?
మేడేపల్లి బ్రిడ్జి వద్ద బట్టబయలైన పనుల నాణ్యత
ప్రారంభమైన కొద్ది నెలల్లోనే కుంగిన మేడేపల్లి వంతెన మార్గం
సీకే న్యూస్ ఖమ్మం ప్రతినిధి ఇస్లావత్ నరసింహ జూలై 31 2026: ప్రజల రాకపోకలను సులభతరం చేయాలనే ఉద్దేశంతో ఏన్కూరు–నాచారం ప్రధాన మార్గంలో మేడేపల్లి వద్ద కోట్ల రూపాయల వ్యయంతో నిర్మించిన హై లెవెల్ వంతెన ప్రారంభమై ఇంకా కొన్ని నెలలు కూడా గడవకముందే వంతెనకు ఆనుకుని ఉన్న అప్రోచ్ రోడ్డు స్వల్ప వర్షానికే కుంగిపోవడం తీవ్ర చర్చనీయాంశంగా మారింది. ప్రజాధనంతో నిర్మించిన ఈ అభివృద్ధి పనుల నాణ్యతపై స్థానికులు తీవ్ర అనుమానాలు వ్యక్తం చేస్తున్నారు.
ఇటీవల కురిసిన వర్షం అనంతరం వంతెనకు అనుసంధానంగా ఉన్న రహదారి భాగం ఒక్కసారిగా కూరుకుపోవడంతో వాహనదారులు తీవ్ర ఇబ్బందులు ఎదుర్కొన్నారు. రహదారి మరింత కుంగిపోయే ప్రమాదం ఉండటంతో ఈ మార్గంలో ప్రయాణించే వారికి ఎప్పుడు ఏ ప్రమాదం జరుగుతుందోనన్న ఆందోళన నెలకొంది. ముఖ్యంగా రాత్రి వేళల్లో ప్రయాణించే వాహనదారులకు ప్రమాదం మరింత ఎక్కువగా ఉందని స్థానికులు చెబుతున్నారు.
కొత్తగా నిర్మించిన వంతెన వద్ద ఇంత తక్కువ కాలంలోనే రహదారి దెబ్బతినడం నిర్మాణ నాణ్యతపై పలు ప్రశ్నలను లేవనెత్తుతోంది. పనుల సమయంలో నాణ్యతా ప్రమాణాలు పాటించారా? నాసిరకం నిర్మాణ సామగ్రిని వినియోగించారా? సంబంధిత ఇంజినీరింగ్ అధికారులు పనులను క్షేత్రస్థాయిలో పర్యవేక్షించారా? అనే అంశాలపై ప్రజలు సమాధానాలు కోరుతున్నారు.
కోట్ల రూపాయల ప్రజాధనంతో చేపట్టిన పనులు స్వల్ప వర్షానికే దెబ్బతినడం ఆందోళన కలిగించే విషయమని గ్రామస్థులు పేర్కొంటున్నారు. ప్రజాధనాన్ని ఖర్చు చేసిన ప్రతి నిర్మాణం దీర్ఘకాలం మన్నికగా ఉండేలా అధికారులు చర్యలు తీసుకోవాల్సిన బాధ్యత ఉందని వారు గుర్తుచేస్తున్నారు.
పనులు పూర్తయ్యాయని చెప్పి చేతులు దులుపుకోవడం కాకుండా, సంబంధిత అధికారులు వెంటనే ఘటనాస్థలాన్ని పరిశీలించి రహదారి కుంగిపోవడానికి గల కారణాలను గుర్తించాలని గ్రామస్థులు డిమాండ్ చేస్తున్నారు. నాణ్యతలో లోపాలు తేలితే బాధ్యులైన కాంట్రాక్టర్తో పాటు పర్యవేక్షణలో నిర్లక్ష్యం వహించిన అధికారులపై కూడా కఠిన చర్యలు తీసుకోవాలని కోరుతున్నారు.
అదేవిధంగా, దెబ్బతిన్న అప్రోచ్ రోడ్డుకు తాత్కాలిక మరమ్మతులు కాకుండా శాశ్వత పరిష్కారం చూపాలని, భవిష్యత్తులో ఇలాంటి ఘటనలు పునరావృతం కాకుండా నిర్మాణ పనుల నాణ్యతపై సమగ్ర విచారణ జరిపి వాస్తవాలను ప్రజలకు వెల్లడించాలని స్థానికులు డిమాండ్ చేస్తున్నారు. ప్రజల ప్రాణాలకు ముప్పు వాటిల్లేలోపు అధికారులు స్పందించి తక్షణ చర్యలు చేపట్టాలని వారు విజ్ఞప్తి చేస్తున్నారు.
