నాచారం అభివృద్ధికి కొత్త బాట.. నాలుగు వరుసల రహదారికి శంకుస్థాపన

నాచారం అభివృద్ధికి కొత్త బాట.. నాలుగు వరుసల రహదారికి శంకుస్థాపన

రూ.43 కోట్లతో నాలుగు వరుసల రహదారి!

నాచారం అద్భుత వేంకటేశ్వర స్వామి ఆలయానికి మహర్దశ

5.6 కిలోమీటర్ల మేర నిర్మాణం.. 2028 ఏప్రిల్ 5 నాటికి పూర్తి చేయాలని ఆదేశం

రహదారి నిర్మాణంతో పరిసర ప్రాంతాల అభివృద్ధి: ఉప ముఖ్యమంత్రి భట్టి విక్రమార్క

సీకే న్యూస్‌ ఖమ్మం జిల్లా ప్రతినిధి ఇస్లావత్‌ నరసింహ ఏన్కూరు అక్టోబర్ 18 2026: ఖమ్మం జిల్లా ఏన్కూరు మండలంలోని రేపల్లెవాడు-నాచారం శ్రీ స్వయంభు అద్భుత వేంకటేశ్వర స్వామి దేవస్థానానికి అనుసంధానంగా నాలుగు వరుసల రహదారి నిర్మాణానికి శ్రీకారం చుట్టారు. రేపల్లెవాడ–నాచారం గ్రామాల మధ్య రూ.43 కోట్ల వ్యయంతో 5.6 కిలోమీటర్ల పొడవున నిర్మించనున్న ఈ రహదారి పనులకు రాష్ట్ర ఉప ముఖ్యమంత్రి మల్లు భట్టి విక్రమార్క, ఖమ్మం ఎంపీ రామసహాయం రఘురాంరెడ్డి, వైరా ఎమ్మెల్యే మాలోత్ రాందాస్ నాయక్ శంకుస్థాపన చేశారు. సుమారు అధిక సంఖ్యలో ప్రజలు, భక్తులు కార్యక్రమానికి హాజరయ్యారు. నిర్మాణ పనులను 2028 ఏప్రిల్ 5వ తేదీ నాటికి పూర్తిస్థాయిలో పూర్తి చేయాలని ఆదేశించారు.

రాష్ట్ర ప్రజలకు దసరా శుభాకాంక్షలు

ఈ సందర్భంగా ఉప ముఖ్యమంత్రి భట్టి విక్రమార్క మాట్లాడుతూ రాష్ట్ర ప్రజలందరికీ దేవీ నవరాత్రులు, విజయదశమి పండుగ శుభాకాంక్షలు తెలియజేశారు. రాష్ట్ర ప్రజలందరూ సుఖసంతోషాలతో, ఆయురారోగ్యాలతో ఉండాలని ఆకాంక్షించారు. సూపర్ ఎల్‌నినో ప్రభావాలను ప్రజలు అధిగమించి, రాష్ట్రం సుభిక్షంగా ఉండాలని కోరుకున్నారు.

ఎమ్మెల్యే పట్టుదలతోనే నాచారం రహదారి నిర్మాణం

నాచారం శ్రీ అద్భుత వేంకటేశ్వర స్వామి దేవస్థానం అభివృద్ధి చెందుతున్న నేపథ్యంలో అక్కడికి వచ్చే భక్తులకు రహదారి సమస్య ఇబ్బందిగా మారుతోందని ఎమ్మెల్యే రాందాస్ నాయక్ తన దృష్టికి తీసుకొచ్చారని ఉప ముఖ్యమంత్రి తెలిపారు. భవిష్యత్తులో దేవస్థానానికి భక్తుల రాకపోకలు మరింత పెరిగే అవకాశం ఉందని, అందుకు అనుగుణంగా రహదారి సౌకర్యం కల్పించాల్సిన అవసరం ఉందని ఎమ్మెల్యే తనకు వివరించినట్లు పేర్కొన్నారు.

నాచారం రహదారి నిర్మాణానికి తప్పనిసరిగా అనుమతులు మంజూరు చేయించి పనులు ప్రారంభించాలని ఎమ్మెల్యే పట్టుబట్టారని తెలిపారు. ఆయన ప్రత్యేక చొరవతో రహదారి నిర్మాణానికి ఆమోదం లభించి, ప్రస్తుతం శంకుస్థాపన కార్యక్రమం నిర్వహించుకుంటున్నామని వివరించారు.

రహదారితో పరిసర ప్రాంతాల అభివృద్ధి

నాలుగు వరుసల రహదారి నిర్మాణం పూర్తయితే వాహనదారులకు రాకపోకలు సులభతరం కావడంతో పాటు పరిసర ప్రాంతాలు కూడా అభివృద్ధి చెందుతాయని ఉప ముఖ్యమంత్రి భట్టి విక్రమార్క పేర్కొన్నారు. నాచారం దేవస్థానానికి వచ్చే భక్తులకు మెరుగైన రవాణా సౌకర్యాలు అందుబాటులోకి వస్తాయని తెలిపారు. రహదారి నిర్మాణం ఈ ప్రాంత అభివృద్ధికి దోహదపడుతుందని ఆశాభావం వ్యక్తం చేశారు.

ఆలయానికి చారిత్రక ప్రాధాన్యం: కలెక్టర్

స్వయంభు శ్రీ అద్భుత వేంకటేశ్వర స్వామి దేవస్థానానికి చారిత్రక ప్రాధాన్యం ఉందని జిల్లా కలెక్టర్ టీఎస్ దివాకర పేర్కొన్నారు. రెండు తెలుగు రాష్ట్రాల నుంచి అనేకమంది భక్తులు స్వామివారి దర్శనానికి వస్తుంటారని తెలిపారు. ఇప్పటివరకు దేవస్థానానికి వెళ్లే రహదారి ఇరుకుగా ఉండటంతో భక్తులు, వాహనదారులు ఇబ్బందులు ఎదుర్కొంటున్నారని వివరించారు.

నాలుగు వరుసల రహదారి నిర్మాణం పూర్తయితే భవిష్యత్తులో ఈ ప్రాంతం మరింత అభివృద్ధి చెందుతుందని, దేవస్థానానికి వచ్చే భక్తులకు మెరుగైన ప్రయాణ సౌకర్యాలు అందుబాటులోకి వస్తాయని పేర్కొన్నారు.

సీతారామ ప్రాజెక్టు, రహదారి అభివృద్ధికి భట్టి విక్రమార్క చొరవ: ఎమ్మెల్యే

వైరా ఎమ్మెల్యే మాలోత్ రాందాస్ నాయక్ మాట్లాడుతూ సీతారామ ప్రాజెక్టు పనులతో పాటు నాలుగు వరుసల రహదారి నిర్మాణం ముందుకు సాగడంలో ఉప ముఖ్యమంత్రి భట్టి విక్రమార్క చొరవ కీలకమని పేర్కొన్నారు. ఈ ప్రాంత అభివృద్ధికి అవసరమైన పనులపై ప్రత్యేక దృష్టి సారించారని తెలిపారు. నాచారం దేవస్థానానికి వచ్చే భక్తులతో పాటు స్థానిక ప్రజలకు రహదారి నిర్మాణం ఎంతో ఉపయోగకరంగా ఉంటుందని వివరించారు.

రూ.43 కోట్లతో 5.6 కిలోమీటర్ల మేర నిర్మాణం

రేపల్లెవాడ–నాచారం గ్రామాల మధ్య రూ.43 కోట్ల వ్యయంతో 5.6 కిలోమీటర్ల పొడవున నాలుగు వరుసల రహదారిని నిర్మించనున్నారు. ఈ రహదారి పనులను 2028 ఏప్రిల్ 5వ తేదీ నాటికి పూర్తిస్థాయిలో పూర్తి చేయాలని ఆదేశించారు. నిర్దేశిత గడువులోగా పనులు పూర్తి చేయడంతో పాటు నిర్మాణ నాణ్యతా ప్రమాణాలను పాటించాల్సి ఉంది.

కోలాటాలు, డప్పు వాయిద్యాలతో ఘన స్వాగతం

శంకుస్థాపన కార్యక్రమానికి హాజరైన ప్రజాప్రతినిధులకు కోలాటాలు, డప్పు వాయిద్యాల నడుమ ఘన స్వాగతం పలికారు. అనంతరం వారు శ్రీ అద్భుత వేంకటేశ్వర స్వామి దేవస్థానాన్ని దర్శించుకుని స్వామివారి ఆశీస్సులు తీసుకున్నారు. తదుపరి రహదారి నిర్మాణ పనులకు శంకుస్థాపన చేశారు. అధిక సంఖ్యలో ప్రజలు, భక్తులు హాజరుకావడంతో కార్యక్రమం సందడిగా సాగింది.

పటిష్ట భద్రతా ఏర్పాట్లు

కార్యక్రమం సందర్భంగా ఎలాంటి అవాంఛనీయ సంఘటనలు చోటుచేసుకోకుండా జిల్లా కలెక్టర్ టీఎస్ దివాకర, పోలీస్ కమిషనర్ సునీల్ దత్ పర్యవేక్షణలో భద్రతా ఏర్పాట్లు చేపట్టారు. పోలీసు సిబ్బంది బందోబస్తు నిర్వహించడంతో కార్యక్రమం ప్రశాంతంగా కొనసాగింది.