పెళ్ళికి నిరాకరించిందని.. యువతికి ఎయిడ్స్ ఇంజక్షన్
రాజు వెడ్స్ రాంబాయి సీన్ రిపీట్…
Web desc : సినిమాలు చూసి వాటిని నిజ జీవితంలో అమలు చేస్తున్నారు. హైదరాబాద్ సమీపంలోని పోచారం ఐటీ కారిడార్ పరిధిలో విషాదకర సంఘటన వెలుగు చూసింది. నిందితుడు మనోహర్, సదరు యువతి కొంతకాలంగా పరిచయస్తులు.
వీరిద్దరికీ పెద్దల సమక్షంలో వివాహం నిశ్చయమైంది. అయితే, తన కాబోయే భర్త మనోహర్కు హెచ్ఐవీ (AIDS) పాజిటివ్ ఉందని యువతికి తెలియడంతో కథ అడ్డం తిరిగింది. తన జీవితాన్ని ప్రమాదంలో పడేయకూడదనే ఉద్దేశంతో ఆమె ధైర్యంగా నిశ్చితార్థాన్ని రద్దు చేసుకుని, పెళ్లికి నిరాకరించింది.
‘రాంబాయి’ సినిమా తరహాలో పగ.. పెళ్లిని నిరాకరించిందనే కక్షతో మనోహర్ తనలోని రాక్షసుడిని బయటకు తీశాడు. 90వ దశకంలో వచ్చిన ‘రాంబాయి’ సినిమాలో విలన్ హీరోయిన్పై పగ తీర్చుకోవడానికి ఏ విధంగానైతే ఎయిడ్స్ వ్యాధిగ్రస్తుడి రక్తాన్ని ఇంజెక్ట్ చేస్తాడో, సరిగ్గా అలాగే ప్లాన్ చేశాడు.
తను ఎలాగో వ్యాధి బారిన పడ్డాను కాబట్టి, ఆ యువతిని కూడా అదే నరకంలోకి నెట్టాలని నిర్ణయించుకున్నాడు. ఇందుకోసం అత్యంత క్రూరంగా పక్కా పథకం రచించాడు.
ఇంట్లోకి చొరబడి దౌర్జన్యం.. ఈ నెల 11వ తేదీన యువతి ఇంట్లో ఒంటరిగా ఉన్న సమయాన్ని చూసి మనోహర్ అక్కడికి వెళ్ళాడు. తనను పెళ్లి చేసుకోవాలని, లేదంటే తీవ్ర పరిణామాలు ఉంటాయని ఆమెను బెదిరించాడు.
యువతి తన నిర్ణయాన్ని మార్చుకోకపోవడంతో మనోహర్ ఒక్కసారిగా ఆమెపై దాడి చేశాడు. ముందుగా సిద్ధం చేసుకున్న సిరంజిని తీసి, బలవంతంగా ఆమె శరీరంలోకి హెచ్ఐవీ సోకిన రక్తాన్ని ఎక్కించాడు. యువతి అరుపులు వేయడంతో అక్కడి నుంచి పరారయ్యాడు.
బాధితురాలి ఆవేదన – పోలీసుల ఎంట్రీ.. తీవ్ర దిగ్భ్రాంతికి గురైన యువతి వెంటనే కుటుంబ సభ్యులకు సమాచారం అందించింది. బాధితురాలు ప్రాణభయంతో వణికిపోతూ జరిగిన దారుణాన్ని వివరించింది.
వెంటనే వారు పోలీసులను ఆశ్రయించడంతో, పోచారం పోలీసులు రంగంలోకి దిగారు. బాధితురాలికి అత్యవసరంగా వైద్య పరీక్షలు చేయించి, ముందస్తు జాగ్రత్తగా యాంటీ రిట్రోవైరల్ థెరపీ (PEP) చికిత్స ప్రారంభించేలా చర్యలు తీసుకున్నారు.
ఒక యువతి భవిష్యత్తును చిన్నాభిన్నం చేయాలనుకున్న మనోహర్ వైఖరిని చూసి స్థానికులు విస్తుపోతున్నారు. కటకటాల వెనక్కి నిందితుడు.. పోలీసులు కేసు నమోదు చేసి గాలింపు చేపట్టి, చివరకు నిందితుడు మనోహర్ను అదుపులోకి తీసుకున్నారు.
విచారణలో తన తప్పును ఒప్పుకున్నట్లు సమాచారం. ప్రేమించిన వ్యక్తి అని నమ్మితే, ప్రాణాపాయం కలిగించే వ్యాధిని సంక్రమింపజేయడం సభ్య సమాజం తలదించుకునేలా ఉంది.
నిందితుడిపై హత్యాయత్నం, ఇతర కఠిన సెక్షన్ల కింద కేసు నమోదు చేశారు. ఈ ఘటన మరొకరికి ఇలాంటి ఆలోచన రాకుండా ఉండేలా కఠిన శిక్ష పడాలని సామాజిక కార్యకర్తలు డిమాండ్ చేస్తున్నారు.
