నీటి చుక్క కోసం ఎదురుచూపులు
ఆరికాయలపాడులో తాగునీటి కష్టాలు
CK న్యూస్ ప్రతినిధి ఇస్లావత్ నరసింహ ఏన్కూరు జులై 11 2026: మండల పరిధిలోని ఆరికాయలపాడు గ్రామంలోని బీసీ కాలనీలో గత కొంతకాలంగా తాగునీటి సరఫరా నిలిచిపోవడంతో కాలనీ వాసులు తీవ్ర ఇబ్బందులు ఎదుర్కొంటున్నారు.
నిత్యావసరమైన తాగునీరు అందుబాటులో లేకపోవడంతో మహిళలు, చిన్నారులు, వృద్ధులు తీవ్ర ఇబ్బందులు పడుతున్నారు. తాగడానికి మాత్రమే కాకుండా వంట, స్నానం, ఇతర గృహ అవసరాల కోసం కూడా నీరు లేక అవస్థలు పడుతున్నామని స్థానికులు ఆవేదన వ్యక్తం చేస్తున్నారు.
తాగునీటి సమస్యను పలుమార్లు సంబంధిత అధికారుల దృష్టికి తీసుకెళ్లినా ఇప్పటివరకు ఎలాంటి శాశ్వత పరిష్కారం చూపలేదని గ్రామస్థులు వాపోతున్నారు. ప్రతి రోజూ ఇతర ప్రాంతాల నుంచి నీటిని తెచ్చుకోవాల్సి వస్తోందని, దీనివల్ల సమయం, శ్రమతో పాటు అదనపు ఖర్చు కూడా భరించాల్సి వస్తోందని తెలిపారు.
వర్షాకాలం అయినప్పటికీ తాగునీటి సమస్య పరిష్కారం కాకపోవడం అధికారుల నిర్లక్ష్యానికి నిదర్శనమని కాలనీ ప్రజలు విమర్శిస్తున్నారు. ప్రజల కనీస అవసరమైన తాగునీటిని సకాలంలో అందించాల్సిన బాధ్యత సంబంధిత శాఖలపై ఉన్నప్పటికీ సమస్యను పట్టించుకోకపోవడం బాధాకరమని పేర్కొన్నారు.
ఇప్పటికైనా మండల అధికారులు తక్షణమే స్పందించి సమస్యకు శాశ్వత పరిష్కారం చూపాలని, తాగునీటి సరఫరాను వెంటనే పునరుద్ధరించి బీసీ కాలనీ ప్రజల ఇబ్బందులను తొలగించాలని స్థానికులు విజ్ఞప్తి చేశారు. సమస్య పరిష్కారంలో జాప్యం చేస్తే ఆందోళన కార్యక్రమాలు చేపట్టాల్సి వస్తుందని హెచ్చరించారు.
