రానున్న వర్షాల నేపథ్యంలో అప్రమత్తం...

రానున్న వర్షాల నేపథ్యంలో అప్రమత్తం…

మండల అధికారులతో విస్తృత స్థాయి సమీక్ష సమావేశం

ప్రజలకు ఇబ్బందులు కలగకుండా ముందస్తు చర్యలు చేపట్టాలని ఆదేశం

CK న్యూస్ ప్రతినిధి ఇస్లావత్ నరసింహ ఏన్కూరు మే 27 2026: ఏన్కూరు మండలంలో రాబోయే భారీ వర్షాలను దృష్టిలో ఉంచుకుని అన్ని ప్రభుత్వ శాఖలు సమన్వయంతో పనిచేయాలని సూచిస్తూ మండల అభివృద్ధి కార్యాలయం (ఎంపీడీవో కార్యాలయం)లో మండల స్థాయి అధికారులతో విస్తృత స్థాయి సమీక్ష సమావేశం నిర్వహించారు. ఈ సమావేశాన్ని ఎంపీడీవో పల్లి భాగ్యశ్రీ ఆధ్వర్యంలో నిర్వహించగా, తహసీల్దార్ సిహెచ్. శేషగిరిరావు, ఎంపీవో జి.వి.ఎస్ నారాయణ ముఖ్యంగా పాల్గొన్నారు.

ఈ సందర్భంగా అధికారులు మాట్లాడుతూ వర్షాకాలంలో ప్రజలకు ఎలాంటి ఇబ్బందులు తలెత్తకుండా ప్రతి శాఖ అప్రమత్తంగా ఉండాలని సూచించారు. గతంలో వర్షాల సమయంలో ఎదురైన సమస్యలను దృష్టిలో ఉంచుకుని ముందస్తు చర్యలు చేపట్టాలని తెలిపారు. ముఖ్యంగా లోతట్టు ప్రాంతాలు, వాగులు, చెరువుల సమీప ప్రాంతాలపై ప్రత్యేక నిఘా ఉంచాలని అధికారులను ఆదేశించారు.

గ్రామాల్లో ఎక్కడైనా నీరు నిల్వ ఉండకుండా డ్రైనేజీ కాలువలను వెంటనే శుభ్రం చేయాలని గ్రామపంచాయతీ అధికారులకు సూచించారు. చెత్త పేరుకుపోయిన ప్రాంతాలను గుర్తించి పారిశుధ్య కార్యక్రమాలు చేపట్టాలని తెలిపారు. దోమల వ్యాప్తి ద్వారా సీజనల్ వ్యాధులు ప్రబలకుండా ఫాగింగ్, బ్లీచింగ్ కార్యక్రమాలను నిరంతరం నిర్వహించాలని ఆదేశించారు.

వైద్య శాఖ అధికారులు గ్రామాల్లో జ్వరాలు, వైరల్ వ్యాధులు ప్రబలకుండా అవసరమైన మందులు, వైద్య సిబ్బందిని సిద్ధంగా ఉంచాలని సూచించారు. అత్యవసర పరిస్థితుల్లో ప్రజలకు తక్షణ వైద్య సేవలు అందేలా చర్యలు తీసుకోవాలని పేర్కొన్నారు. అవసరమైతే ప్రత్యేక వైద్య శిబిరాలు కూడా ఏర్పాటు చేయాలని సూచించారు.

విద్యుత్ శాఖ అధికారులు గాలివానలు, భారీ వర్షాల కారణంగా విద్యుత్ అంతరాయాలు తలెత్తకుండా ముందస్తు మరమ్మత్తులు చేపట్టాలని తెలిపారు. ప్రమాదకరంగా ఉన్న విద్యుత్ స్తంభాలు, వైర్లను వెంటనే సరిచేయాలని ఆదేశించారు. ఎలాంటి సమస్య వచ్చినా వెంటనే స్పందించే విధంగా సిబ్బందిని అందుబాటులో ఉంచాలని సూచించారు.

వ్యవసాయ శాఖ అధికారులు రైతులకు వర్షాకాల పంటలపై అవగాహన కల్పించాలని, పంట నష్టాలు తగ్గేలా సూచనలు ఇవ్వాలని తెలిపారు. అలాగే పశుసంవర్ధక శాఖ అధికారులు పశువులకు వ్యాధులు రాకుండా అవసరమైన టీకాలు, వైద్య సేవలు అందించాలని సూచించారు.

రెవెన్యూ శాఖ అధికారులు వరద ప్రభావిత ప్రాంతాలపై ప్రత్యేక దృష్టి సారించాలని, అత్యవసర పరిస్థితుల్లో సహాయక చర్యలకు సిద్ధంగా ఉండాలని పేర్కొన్నారు. ఎప్పటికప్పుడు వాతావరణ పరిస్థితులను గమనిస్తూ ప్రజలకు ముందస్తు హెచ్చరికలు అందించాలని సూచించారు.

అన్ని శాఖల అధికారులు సమన్వయంతో పనిచేస్తేనే వర్షాకాలంలో ప్రజలకు ఇబ్బందులు తగ్గించగలమని అధికారులు అభిప్రాయపడ్డారు. ప్రజలు కూడా అప్రమత్తంగా ఉండి అధికారులకు సహకరించాలని కోరారు. ఈ సమావేశంలో వివిధ శాఖల మండల స్థాయి అధికారులు, సిబ్బంది, గ్రామపంచాయతీ ప్రతినిధులు పాల్గొన్నారు.