భర్తతో గొడవ.. ఖమ్మం రైల్వేస్టేషన్‌లో దిగిన మహిళ అదృశ్యం
Web desc : బతుకమ్మ పండుగ సందర్భంగా స్వగ్రామానికి వచ్చేందుకు భర్తతో కలిసి రైలు ప్రయాణం చేసిన ఓ వివాహిత ఖమ్మం రైల్వేస్టేషన్‌లో దిగిన అనంతరం అదృశ్యమైన ఘటన వెలుగులోకి వచ్చింది. ప్రయాణ సమయంలో భార్యాభర్తల మధ్య గొడవ జరిగినట్లు ఫిర్యాదులో పేర్కొనడం, ఆ తర్వాత మహిళ ఆచూకీ లేకపోవడం కలకలం రేపుతోంది. బాధితురాలి సోదరుడి ఫిర్యాదు మేరకు ఖమ్మం వన్ టౌన్ పోలీసులు మిస్సింగ్ కేసు నమోదు చేసి దర్యాప్తు చేపట్టారు.
పోలీసులకు అందిన ఫిర్యాదు వివరాల ప్రకారం.. నల్గొండ జిల్లా నల్గొండ మండలం బుద్ధారం గ్రామానికి చెందిన తండు సుదర్శన్ సోదరి ఎలమకంటి లక్ష్మి (38), ఆమె భర్త బాలకృష్ణ రాజస్థాన్ రాష్ట్రంలోని కలేంద్ర గ్రామంలో కల్లు వ్యాపారం చేస్తూ జీవనం సాగిస్తున్నారు. ప్రతి సంవత్సరం బతుకమ్మ పండుగ సందర్భంగా స్వగ్రామానికి వచ్చే వీరు, ఈ ఏడాది కూడా పండుగ కోసం బయలుదేరారు.
ఈ క్రమంలో అక్టోబర్ 11న రాత్రి సుమారు 8.30 గంటలకు నవజీవన్ ఎక్స్‌ప్రెస్ రైలులో ఖమ్మం రైల్వేస్టేషన్‌కు చేరుకున్నారు. అయితే, రైలు ప్రయాణంలో లక్ష్మి, బాలకృష్ణ మధ్య గొడవ జరిగినట్లు ఫిర్యాదులో పేర్కొన్నారు. రైల్వేస్టేషన్‌లో దిగిన అనంతరం స్టేషన్ ముందున్న ఆటో స్టాండ్ వద్ద వారిని చూసినట్లు ఫిర్యాదుదారుడి కోడలు సుదర్శన్‌కు సమాచారం అందించినట్లు తెలుస్తోంది. మరుసటి రోజు అక్టోబర్ 12న ఉదయం సుమారు 11 గంటల సమయంలో ఖమ్మం మయూరి సెంటర్ వద్ద ఫిర్యాదుదారుడి కోడలు ఏడుస్తూ ఉండటాన్ని ఆటో డ్రైవర్ ఆంజనేయులు గమనించినట్లు ఫిర్యాదులో తెలిపారు.
అనంతరం ఆమెతోపాటు బాలకృష్ణను ఆటోలో రైల్వేస్టేషన్‌కు తీసుకెళ్లి, వారి బ్యాగులను జీఆర్పీ పోలీస్‌స్టేషన్‌లో అప్పగించినట్లు పేర్కొన్నారు. ఈ విషయాన్ని ఆటో డ్రైవర్ ఆంజనేయులు ఫోన్ ద్వారా తండు సుదర్శన్‌కు తెలియజేశారు. అక్టోబర్ 11న రైలు దిగిన అనంతరం లక్ష్మి కనిపించడం లేదని, ఆమె భర్తతోపాటు ఫిర్యాదుదారుడి కోడలు రైల్వేస్టేషన్ వద్ద ఉన్నారని సమాచారం అందించారు.
దీంతో ఆందోళన చెందిన సుదర్శన్ ఖమ్మం నగరంలోని పలు ప్రాంతాల్లో తన సోదరి కోసం గాలించినప్పటికీ ఎలాంటి ఆచూకీ లభించలేదు. అదృశ్యమైన లక్ష్మి ఎత్తు సుమారు 5 అడుగుల 2 అంగుళాలు ఉంటుందని, నలుపు వర్ణం కలిగి ఉంటుందని ఫిర్యాదులో పేర్కొన్నారు. తన సోదరి ఆచూకీ గుర్తించాలని కోరుతూ తండు సుదర్శన్ పోలీసులను ఆశ్రయించారు.
ఫిర్యాదు ఆధారంగా ఇన్‌స్పెక్టర్ ఎండీ సాదిక్ పాషా ఆదేశాల మేరకు ఎస్సై జి. శ్రీనివాస్ మిస్సింగ్ కేసు నమోదు చేసి దర్యాప్తు చేపట్టారు. మహిళ అదృశ్యానికి దారితీసిన పరిస్థితులు, రైలు ప్రయాణంలో జరిగినట్లు చెబుతున్న గొడవ, రైల్వేస్టేషన్‌లో దిగిన అనంతరం ఆమె ఎక్కడికి వెళ్లిందనే అంశాలపై దర్యాప్తులో స్పష్టత రావాల్సి ఉంది. మహిళ ఆచూకీ కోసం పోలీసులు విచారణ కొనసాగిస్తున్నారు.
