
కల్తీ మద్యం సేవించి 15 మంది మృతి, 180 మందికి పైగా ఆసుపత్రి పాలు
Web desc : మణిపూర్లోని చందేల్ జిల్లాలో కల్తీ మద్యం తీవ్ర విషాదాన్ని నింపింది. గడిచిన 48 గంటల వ్యవధిలో అనుమానాస్పద కల్తీ మద్యం సేవించి 15 మంది ప్రాణాలు కోల్పోగా, మరో 180 మందికి పైగా తీవ్ర అస్వస్థతకు గురై వివిధ ఆసుపత్రుల్లో చికిత్స పొందుతున్నారు.
నవంబర్ 18 నుంచి 20వ తేదీ మధ్య ఈ మరణాలు సంభవించినట్లు అధికారులు వెల్లడించారు. బాధితుల్లో కొందరు ఇళ్ల వద్దే మృతి చెందగా, మరికొందరు చక్పికరోంగ్ కమ్యూనిటీ హెల్త్ సెంటర్కు తరలిస్తుండగా లేదా చికిత్స పొందుతూ తుదిశ్వాస విడిచారు.
ఈ ఘటనపై చందేల్ జిల్లా పోలీసులు స్పష్టతనిస్తూ.. బాధితులు సేవించిన మద్యాన్ని కక్చింగ్ జిల్లాలోని సుగ్ను ప్రాంతం నుంచి కొనుగోలు చేసినట్లు ప్రాథమికంగా గుర్తించామని తెలిపారు. ఈ మద్యాన్ని చందేల్ జిల్లాలో తయారు చేయలేదని, నమోదైన మరణాల్లో ఐదు సుగ్ను పోలీస్ స్టేషన్ పరిధిలోకి వస్తాయని పేర్కొన్నారు.
ఈ వ్యవహారంపై దర్యాప్తు కొనసాగుతోందని, ప్రజలు మరియు మీడియా సంస్థలు ధృవీకరించని వార్తలను ప్రచారం చేయవద్దని పోలీసులు విజ్ఞప్తి చేశారు. మరోవైపు, మరణాలకు గల ఖచ్చితమైన కారణాలను వైద్య, శాస్త్రీయ పరంగా నిర్ధారించాల్సి ఉందని చందేల్ డిప్యూటీ కమిషనర్ పేర్కొంటూ ప్రజలకు ఆరోగ్య హెచ్చరికలు (హెల్త్ అడ్వైజరీ) జారీ చేశారు.
తదుపరి ఆదేశాలు వచ్చే వరకు స్థానికంగా తయారు చేసే మద్యం లేదా అనుమానాస్పద మద్యం సేవించవద్దని సూచించారు. మద్యం సేవించిన తర్వాత వాంతులు, కడుపునొప్పి, తలనొప్పి, తలతిరగడం, చూపు మసకబారడం లేదా శ్వాస తీసుకోవడంలో ఇబ్బంది వంటి లక్షణాలు కనిపిస్తే వెంటనే వైద్యులను సంప్రదించాలని కోరారు.
లక్షణాలు లేకపోయినా అనుమానాస్పద ప్రాంతాల్లో మద్యం తాగిన వారు వైద్య పరీక్షలు చేయించుకోవాలని, కల్తీ మద్యం విక్రయాలపై పోలీసులకు సమాచారం అందించాలని అధికారులు విజ్ఞప్తి చేశారు. ఈ ఘటనపై మణిపూర్ ముఖ్యమంత్రి యుమ్నామ్ ఖేమ్చంద్ సింగ్ తీవ్ర దిగ్భ్రాంతి వ్యక్తం చేశారు.
గురువారం ఆయన ఇంఫాల్ వెస్ట్లోని షిజా ఆసుపత్రి, ఇంఫాల్ ఈస్ట్లోని బబినా ఆసుపత్రిని సందర్శించి బాధితుల ఆరోగ్య పరిస్థితిని అడిగి తెలుసుకున్నారు. బాధితులకు మెరుగైన వైద్యం అందించాలని వైద్యులను ఆదేశించడంతో పాటు ప్రభుత్వం అన్ని విధాలా అండగా ఉంటుందని భరోసా ఇచ్చారు.
ఈ దురదృష్టకర ఘటనకు బాధ్యులైన వారిని గుర్తించి త్వరలోనే అరెస్టు చేస్తామని, సమగ్ర విచారణకు ఆదేశించామని సీఎం తెలిపారు. అత్యవసర పరిస్థితిని ఎదుర్కొనేందుకు జనరల్ మెడిసిన్ నిపుణులతో కూడిన ప్రత్యేక వైద్య బృందాన్ని, మందులను చందేల్ జిల్లాకు పంపినట్లు ఆయన వెల్లడించారు.




