ఏన్కూర్ కేంద్రంలో సీఎం రేవంత్ రెడ్డి, ఎమ్మెల్యే రాందాస్ నాయక్కు పాలాభిషేకం
ఏన్కూర్ మండల అభివృద్ధికి సీఎం,ఎమ్మెల్యే కృషి
ఘనంగా పలాభిషేక కార్యక్రమం నిర్వహించిన కాంగ్రెస్ శ్రేణులు
CK న్యూస్ ప్రతినిధి ఇస్లావత్ నరసింహ ఏన్కూరు మే 13 2026: ఖమ్మం జిల్లా ఏన్కూర్ మండల కేంద్రంలో బుధవారం కాంగ్రెస్ పార్టీ నాయకులు, కార్యకర్తలు, ప్రజాప్రతినిధులు భారీ ఎత్తున పాల్గొని తెలంగాణ ముఖ్యమంత్రి రేవంత్ రెడ్డి మరియు వైరా ఎమ్మెల్యే రాందాస్ నాయక్ లకు ఘనంగా పాలాభిషేక కార్యక్రమాన్ని నిర్వహించారు. మండల అభివృద్ధికి వరుసగా మంజూరవుతున్న పలు అభివృద్ధి, సంక్షేమ పథకాల పట్ల హర్షం వ్యక్తం చేస్తూ ఈ కార్యక్రమాన్ని చేపట్టినట్లు నాయకులు తెలిపారు.
ఏన్కూర్ మండలానికి 30 పడకల ప్రభుత్వ ఆసుపత్రి మంజూరు కావడం పట్ల ప్రజలు ప్రత్యేక ఆనందం వ్యక్తం చేస్తున్నారు. మండల ప్రజలు వైద్య సేవల కోసం దూర ప్రాంతాలకు వెళ్లాల్సిన పరిస్థితులు ఉన్న నేపథ్యంలో ఈ ఆసుపత్రి మంజూరు ఎంతో ఉపయోగకరంగా మారనుందని అభిప్రాయపడ్డారు. అలాగే యువతకు సాంకేతిక విద్య అందించేందుకు ఐటీఐ కళాశాల మంజూరు చేయడం ద్వారా స్థానిక విద్యార్థులకు ఉపాధి అవకాశాలు మెరుగుపడనున్నాయని పేర్కొన్నారు.
ఇక రైతులకు సాగునీటి సౌకర్యం కల్పించేందుకు సీతారామ ప్రాజెక్టు కాలువ పనులు చేపట్టడం వల్ల వేలాది ఎకరాలకు నీరు అందే అవకాశం ఉందని తెలిపారు. గ్రామీణ ప్రాంతాల్లో మౌలిక వసతుల అభివృద్ధిలో భాగంగా సీసీ రోడ్లు, డ్రైనేజీలు, ఇతర అభివృద్ధి పనులకు నిధులు మంజూరు చేయడం పట్ల ప్రజలు సంతోషం వ్యక్తం చేశారు. అదేవిధంగా పేదలకు ఇందిరమ్మ ఇళ్ల పథకం ద్వారా గృహాలు మంజూరు చేయడం, విద్యార్థుల భవిష్యత్తును దృష్టిలో ఉంచుకొని తెలంగాణ మోడల్ పాఠశాలను ఏర్పాటు చేయడం వంటి చర్యలు మండల అభివృద్ధికి దోహదపడతాయని నాయకులు పేర్కొన్నారు.
ఈ సందర్భంగా కాంగ్రెస్ నాయకులు మాట్లాడుతూ వైరా ఎమ్మెల్యే మాలోత్ రాందాస్ నాయక్ ప్రత్యేక చొరవతోనే ఏన్కూర్ మండలానికి అనేక అభివృద్ధి కార్యక్రమాలు, సంక్షేమ పథకాలు మంజూరు అవుతున్నాయని తెలిపారు. ప్రజల సమస్యలను ప్రభుత్వం దృష్టికి తీసుకెళ్లడంలో ఎమ్మెల్యే కీలక పాత్ర పోషిస్తున్నారని కొనియాడారు. ముఖ్యమంత్రి రేవంత్ రెడ్డి నాయకత్వంలో తెలంగాణ రాష్ట్రం అభివృద్ధి దిశగా ముందుకు సాగుతోందని, గ్రామీణ ప్రాంతాలకు ప్రత్యేక ప్రాధాన్యత ఇస్తున్నారని పేర్కొన్నారు. పాలాభిషేక కార్యక్రమంలో కాంగ్రెస్ పార్టీ మండల, గ్రామ స్థాయి నాయకులు, అనుబంధ సంఘాల ప్రతినిధులు, ప్రజాప్రతినిధులు, సొసైటీ చైర్మన్లు, డైరెక్టర్లు, మార్కెట్ కమిటీ సభ్యులు, సర్పంచులు, ఉపసర్పంచులు, మాజీ ఎంపీపీలు, జడ్పీటీసీలు, ఎంపీటీసీలు, మహిళా నాయకులు, యువజన నాయకులు, ఎస్సీ, ఎస్టీ, బీసీ, మైనారిటీ విభాగాల అధ్యక్షులు, కార్యకర్తలు మరియు పెద్ద సంఖ్యలో ప్రజలు పాల్గొన్నారు.
కార్యక్రమం సందర్భంగా కాంగ్రెస్ కార్యకర్తలు నినాదాలతో ప్రాంతాన్ని మార్మోగించారు. సీఎం రేవంత్ రెడ్డి, ఎమ్మెల్యే రాందాస్ నాయక్ చిత్రపటాలకు పాలాభిషేకం చేసి మిఠాయిలు పంచిపెట్టారు. మండల అభివృద్ధికి మరిన్ని నిధులు తీసుకురావాలని నాయకులను కోరుతూ ప్రజలు తమ అభిప్రాయాలను వెల్లడించారు. రానున్న రోజుల్లో ఏన్కూర్ మండలాన్ని అన్ని రంగాల్లో అభివృద్ధి పథంలో ముందుకు తీసుకెళ్లేందుకు ప్రభుత్వం కట్టుబడి ఉందని నాయకులు స్పష్టం చేశారు.
