గురుకులంలో ఆడపిల్లల నరకయాతన.. చుక్క నీరు లేక రోడ్డెక్కిన బాలికలు!
దాహం కేక.. రోడ్డెక్కిన బాలికలు. గురుకుల పాఠశాలలో నీటి కష్టాలపై భగ్గుమన్న విద్యార్థినులు. చదువుల తల్లి ఒడిలో ప్రశాంతంగా విద్యాభ్యాసం సాగించాల్సిన ఆ బాలికలు రోడ్డెక్కారు.
ప్లకార్డులు చేతబట్టి నినదించారు. కనీస అవసరాలు తీర్చలేని నిర్లక్ష్యపు యాజమాన్యం తీరుపై భగ్గుమన్నారు.
గురుకులాల్లో సకల సదుపాయాలు కల్పిస్తున్నామని ప్రభుత్వాలు గొప్పలు చెబుతున్నా క్షేత్రస్థాయిలో పరిస్థితులు ఎంత దయనీయంగా ఉన్నాయో ఈ ఘటనే కళ్లకు కడుతోంది. మహబూబాబాద్ జిల్లా కొత్తగూడ మండలం గాంధీనగర్లోని సోషల్ వెల్ఫేర్ బాలికల గురుకుల పాఠశాలలో నెలకొన్న దారుణ పరిస్థితులు స్థానికంగా తీవ్ర కలకలం రేపుతున్నాయి.
హాస్టళ్లలో నాణ్యమైన భోజనం, మెరుగైన వసతులు ఇస్తున్నామని పాలకులు వేదికలెక్కి ఉపన్యాసాలు దంచడమే తప్ప ఆచరణలో శూన్యమని ఈ నిరసనలు స్పష్టం చేస్తున్నాయి. గత నెల రోజులుగా ఈ గురుకుల పాఠశాలలో విద్యార్థినులు నీటి సమస్యతో అక్షరాలా నరకం అనుభవిస్తున్నారు.
ప్రతిరోజూ ఉదయం నిద్ర లేవగానే కాలకృత్యాలు తీర్చుకోవడానికి కనీసం చుక్క నీరు దొరకని దుస్థితి అక్కడ నెలకొంది. బాత్రూమ్లకు వెళ్లాలంటేనే భయపడే స్థాయికి పరిస్థితులు దిగజారాయి. కనీసం మరుగుదొడ్లు శుభ్రం చేయడానికి కూడా నీళ్లు లేకపోవడంతో దుర్వాసన మధ్యే పిల్లలు కాలం వెళ్లదీస్తున్నారు.
స్నానాలు చేయడానికి, బట్టలు ఉతుక్కోవడానికి తీవ్ర ఇబ్బందులు ఎదుర్కొంటున్నారు. ఆడపిల్లల వ్యక్తిగత పరిశుభ్రతకు నీరు అత్యంత ఆవశ్యకం అన్న కనీస స్పృహ కూడా నిర్వాహకులకు లేకపోవడం గమనార్హం. పారిశుద్ధ్యం లోపించి అంటువ్యాధులు ప్రబలే ప్రమాదం పొంచి ఉన్నా అధికారులు ఏమాత్రం పట్టించుకోవడం లేదని విద్యార్థినులు కన్నీరుమున్నీరుగా విలపిస్తున్నారు.
వందలాది మంది ఆడపిల్లలు ఉండే హాస్టల్లో నీటి కొరత ఉంటే ఎంతటి నరకం ఉంటుందో అర్థం చేసుకోవచ్చని స్థానికులు సైతం సానుభూతి వ్యక్తం చేస్తున్నారు. కనీస వసతులు కల్పించాల్సిన బాధ్యత ఉన్న ఉపాధ్యాయులు, ప్రిన్సిపాల్ తీరు మరింత దిగజారిపోయిందని విద్యార్థినులు ఆరోపిస్తున్నారు. తమ కష్టాలను గురుకుల పాఠశాల ప్రధానోపాధ్యాయుడి దృష్టికి తీసుకెళ్తే ఆయన వింత వాదన తెరపైకి తెచ్చారు.
మోటారు చెడిపోయిందని, దాన్ని బాగు చేయించడానికి ఒక్కో విద్యార్థిని పది రూపాయలు చందాగా ఇవ్వాలని ఉచిత సలహా ఇచ్చారని వారు వాపోయారు. సమస్యలను ప్రశ్నిస్తే ఉపాధ్యాయులు సైతం తమను మానసికంగా వేధిస్తున్నారని, బెదిరింపులకు గురిచేస్తున్నారని విద్యార్థినులు ఆవేదన వ్యక్తం చేశారు. విద్యాబుద్ధులు నేర్పాల్సిన గురువులే ఇలా వసూళ్లకు పాల్పడటం, బెదిరించడం పట్ల సర్వత్రా విమర్శలు వ్యక్తమవుతున్నాయి.
ప్రభుత్వం ఉచితంగా అందించే విద్య కోసం వస్తే, మోటారు రిపేర్ల పేరుతో ఇలా డబ్బులు వసూలు చేయడం ఏంటని విద్యార్థి సంఘాలు సైతం మండిపడుతున్నాయి. నిర్వాహకుల నిర్లక్ష్యానికి, యాజమాన్యం వేధింపులకు విసిగిపోయిన ఆ బాలికలు చివరకు ఆందోళన బాట పట్టారు. నేరుగా రోడ్డుపైకి వచ్చి బైఠాయించారు.
యాజమాన్యానికి వ్యతిరేకంగా పెద్ద పెట్టున నినాదాలు చేశారు. దారికి అడ్డంగా కూర్చుని తమ నిరసన గళాన్ని బలంగా వినిపించారు. తమకు వెంటనే నీటి వసతి కల్పించాలని వారు డిమాండ్ చేశారు. పాడైన మోటార్లను వెంటనే బాగు చేసి నిరంతరాయంగా నీరు అందించేలా తక్షణ చర్యలు తీసుకోవాలని పట్టుబట్టారు.
విద్యార్థులను బెదిరిస్తున్న ఉపాధ్యాయులపై, డబ్బులు అడిగిన ప్రధానోపాధ్యాయుడిపై ఉన్నతాధికారులు కఠిన చర్యలు తీసుకోవాలని కోరారు. కలెక్టర్, విద్యాశాఖ ఉన్నతాధికారులు నేరుగా జోక్యం చేసుకుని తమ సమస్యలు శాశ్వతంగా పరిష్కరించాలని విజ్ఞప్తి చేశారు. లేని పక్షంలో ఆందోళన మరింత ఉధృతం చేస్తామని హెచ్చరించారు.
