సీజనల్ వ్యాధుల నివారణకు దోమల మందు పిచికారి
గుమ్మడిదొడ్డి గ్రామపంచాయతీ ఆధ్వర్యంలో ముందస్తు చర్యలు
సి కే న్యూస్ వాజేడు మండల ప్రతినిధి : షేక్ రహీమ్ వర్షాకాలం అనంతరం సీజనల్ వ్యాధులు ప్రబలకుండా, దోమల బెడద నుంచి గ్రామ ప్రజలకు విముక్తి కల్పించేందుకు వాజేడు మండలం గుమ్మడిదొడ్డి గ్రామపంచాయతీ సర్పంచ్ బోదెబోయిన భరత్ కుమార్ ఆధ్వర్యంలో ముందస్తు చర్యలు చేపట్టారు. గ్రామపంచాయతీ పరిధిలోని ఇప్పగూడెం గ్రామంలో ఇంటింటికీ దోమల మందు పిచికారీ కార్యక్రమాన్ని నిర్వహించారు.
గ్రామాల్లో దోమల వ్యాప్తి పెరగడం వల్ల ప్రజలు ఇబ్బందులు ఎదుర్కొనే అవకాశం ఉన్న నేపథ్యంలో, ముందస్తు జాగ్రత్త చర్యల్లో భాగంగా ఈ కార్యక్రమాన్ని చేపట్టారు. ముఖ్యంగా డెంగ్యూ, మలేరియా వంటి దోమల ద్వారా వ్యాపించే వ్యాధుల ముప్పును తగ్గించేందుకు గ్రామంలోని ఇళ్ల పరిసరాలు, దోమలు పెరిగే అవకాశం ఉన్న ప్రాంతాల్లో మందు పిచికారీ చేయడంపై దృష్టి సారించారు.
గ్రామ ప్రజల ఆరోగ్య పరిరక్షణకు ప్రాధాన్యతనిస్తూ, వ్యాధులు వ్యాప్తి చెందకముందే నివారణ చర్యలు చేపట్టడం అవసరమని ఈ సందర్భంగా పేర్కొన్నారు. గ్రామంలో పారిశుధ్య నిర్వహణ, పరిసరాల పరిశుభ్రతతో పాటు దోమల నియంత్రణకు ప్రజలు కూడా సహకరించాలని సూచించారు.
