ఏన్కూరులో ప్రైవేటు సీడ్ మొక్కజొన్న కొనుగోళ్లలో గందరగోళం
లారీలు లేవంటూ ఆలస్యం… రైతులను వేధిస్తున్న కంపెనీ ఏజెంట్లు
బస్తాకు రూ.10 ఎగుమతి ఖర్చు – “మా ఇష్టం” అంటున్న ఏజెంట్లు
ఆరు కాలాలపాటు కష్టపడి పండించిన పంటకు న్యాయం ఎక్కడ? – ప్రైవేటు సీడ్ మొక్కజొన్న రైతుల ఆవేదన
సికే న్యూస్ ప్రతినిధి ఇస్లావత్ నరసింహ ఏన్కూరు ఏప్రిల్ 09 2026: ఆరు కాలాలపాటు ఎండలు, వానలు తట్టుకుని రాత్రింబవళ్లు శ్రమించి పండించిన మొక్కజొన్న పంటకు సరైన న్యాయం దక్కడం లేదని ఏన్కూరు మండలంలోని రైతులు తీవ్ర ఆవేదన వ్యక్తం చేస్తున్నారు. ప్రైవేటు కంపెనీలతో ఒప్పందం కుదుర్చుకుని సీడ్ మొక్కజొన్న సాగు చేసిన రైతులు, కొనుగోలు దశలో అనేక ఇబ్బందులు ఎదుర్కొంటున్నారు.
చేనుల నుంచి మొక్కజొన్నను విరిచి ఎండబెట్టి సిద్ధం చేసినప్పటికీ, కంపెనీలు సమయానికి పంటను తీసుకెళ్లడం లేదని రైతులు చెబుతున్నారు. నాలుగు నుంచి ఐదు రోజుల పాటు కూడా లారీలు రాకపోవడంతో పంట వే బ్రిడ్జి కాటాల వద్దే నిల్వ ఉండిపోతోంది. దీంతో రైతులు అక్కడే కాపలా కాయాల్సిన పరిస్థితి ఏర్పడుతోంది.
ముఖ్యంగా, కొందరు రైతులకు మొక్కజొన్నను సంచుల్లో నింపేందుకు అవసరమైన గన్నీ సంచులు కూడా కంపెనీలు ఇవ్వడం లేదని తీవ్రంగా ఆరోపిస్తున్నారు. సంచులు ఇవ్వకపోవడంతో పంటను చేనులోనే ఉంచాల్సి వస్తోందని, దీనివల్ల ఎండ, గాలి, వర్షం ప్రభావంతో పంట నాణ్యత తూకం తగ్గిపోతుందని రైతులు ఆవేదన వ్యక్తం చేస్తున్నారు.
ఏజెంట్లను బతిమిలాడినా కూడా స్పందించకుండా, “మీరు ఖమ్మం వెళ్లి మీ సొంత ఖర్చుతో సంచులు తెచ్చుకోండి” అని చెప్పడం రైతులను మరింత ఇబ్బందులకు గురి చేస్తోందని వాపోతున్నారు. ఇప్పటికే పంట సాగులో భారీ ఖర్చులు చేసిన రైతులు, ఇప్పుడు అదనంగా సంచుల కోసం కూడా ఖర్చు పెట్టాల్సి రావడం ఆర్థికంగా భారమవుతోంది.
ఇంకా, సాధారణంగా కాటా వేసి పక్కన దింపాల్సిన మొక్కజొన్నను ఆ విధంగా స్వీకరించడం లేదని రైతులు ఆరోపిస్తున్నారు. లారీలు లేవని చెప్పి ఆలస్యం చేస్తూ, లారీలు వచ్చిన తర్వాత మాత్రం ట్రాక్టర్ల నుంచి నేరుగా లారీలకు లోడ్ చేయాలని ఒత్తిడి తెస్తున్నారు. దీంతో రైతులు అదనపు కూలీలను పెట్టుకోవాల్సి వస్తూ ఖర్చులు పెరుగుతున్నాయి.
అంతేకాకుండా, బస్తాకు పది రూపాయలు ఎగుమతి ఖర్చుల పేరుతో కూడా రైతులపై భారం మోపుతున్నారని రైతులు వాపోతున్నారు. గతంలో ఎటువంటి ఎగుమతి ఖర్చులు లేకపోయినా, ఇప్పుడు కొత్తగా ఈ విధంగా డబ్బులు వసూలు చేయడం అన్యాయమని వారు అంటున్నారు. ఇది రైతుల ఆదాయాన్ని మరింత తగ్గిస్తున్నదని ఆందోళన వ్యక్తం చేస్తున్నారు.
ఈ సమస్యలపై ప్రశ్నిస్తే, “మా నియమాలు ఇవే” అంటూ ఏజెంట్లు దురుసుగా ప్రవర్తిస్తున్నారని రైతులు ఆగ్రహం వ్యక్తం చేస్తున్నారు. రైతులు గట్టిగా మాట్లాడితే తమకు రావాల్సిన చెల్లింపులు ఆలస్యమవుతాయో లేక ఇవ్వకపోతారోనన్న భయంతో మౌనం వహిస్తున్నారు.
మరోవైపు, ట్రాక్టర్ల నుంచి నేరుగా లారీలు లోడ్ చేయించడం వల్ల గ్రామీణ రహదారులపై ట్రాఫిక్ సమస్యలు తలెత్తుతున్నాయి. గంటల తరబడి వాహనాలు నిలిచిపోవడంతో ప్రజలు కూడా ఇబ్బందులు పడుతున్నారు.
ఆరు కాలాలపాటు కష్టపడి పండించిన పంటకు ఈ విధంగా ఇబ్బందులు ఎదురవుతుండటంతో రైతులు తీవ్ర నిరాశకు గురవుతున్నారు. సంబంధిత అధికారులు వెంటనే స్పందించి ప్రైవేటు సీడ్ కంపెనీలపై చర్యలు తీసుకుని, కొనుగోలు ప్రక్రియను సక్రమంగా నిర్వహించేలా చూడాలని, రైతులకు న్యాయం చేయాలని వారు డిమాండ్ చేస్తున్నారు.
