అత్తకు ఆధార్‌ మార్పిస్తానని చెప్పి.. 20 గుంటల భూమి స్వాహా చేసిన అల్లుడు
Web desc : కోదాడ: ఆధార్‌ కార్డు అప్‌డేట్‌ చేయిస్తానని చెప్పి వృద్ధురాలిని వెంట తీసుకెళ్లి.. ఆమెకు చెందిన వ్యవసాయ భూమిని మనవరాలి పేరిట బదలాయింపు చేయించారంటూ వచ్చిన ఆరోపణలు కోదాడ పట్టణంలోని లక్ష్మీపురం కాలనీలో కలకలం రేపుతున్నాయి.
తనకు తెలియకుండానే సుమారు 20 గుంటల భూమి మనవరాలు వినీత పేరుపైకి వెళ్లిందని వృద్ధురాలు రాములమ్మ ఆవేదన వ్యక్తం చేస్తోంది.
తన అల్లుడు రాములు మాయమాటలు చెప్పి తనను తీసుకెళ్లాడని, ఆధార్‌ కార్డు మార్పు కోసం వెళ్తున్నాననే ఉద్దేశంతోనే తాను వెళ్లానని రాములమ్మ చెబుతోంది. అయితే అనంతరం తన భూమికి సంబంధించిన వ్యవహారం జరిగిందని తెలిసి షాక్‌కు గురయ్యానని వాపోతోంది.
ఆధార్‌ అప్‌డేట్‌ అని చెప్పి.. భూమి రిజిస్ట్రేషన్‌ చేశారా?
వృద్ధురాలి ఆరోపణల ప్రకారం.. ఆధార్‌లో వివరాలు సరిచేయించాల్సి ఉందంటూ ఆమెను అల్లుడు రాములు వెంట తీసుకెళ్లాడు. తనకు చదువు లేకపోవడం, వయసు పైబడటం వల్ల పత్రాల్లో ఏముందో పూర్తిగా తెలుసుకోలేకపోయానని ఆమె చెబుతోంది.
ఈ క్రమంలో తనకు చెందిన భూమి మనవరాలు వినీత పేరుపైకి వెళ్లిందని ఆరోపిస్తోంది. ఆధార్‌ మార్పు కోసం తీసుకెళ్లారని నమ్మాను.. నా భూమి పోతుందని తెలియదు” అంటూ రాములమ్మ కన్నీటి పర్యంతమవుతోంది. భూ పత్రాలు చేతిలో.. న్యాయం కోసం పరుగులు
వీడియోలో వృద్ధురాలు భూమికి సంబంధించిన పత్రాలను చూపిస్తూ తనకు న్యాయం చేయాలని కోరుతున్నట్లు కనిపిస్తోంది. చూపించిన పత్రాల్లో భూమికి సంబంధించిన సర్వే నంబర్లు, విస్తీర్ణ వివరాలు కనిపిస్తున్నాయి. భూమి బదలాయింపు ఏ విధంగా జరిగిందన్నది సంబంధిత రికార్డుల పరిశీలనతోనే తేలాల్సి ఉంది.బంధువుల ఇంట్లో ఉన్న వృద్ధురాలిని తీసుకెళ్లారా? భూమి వ్యవహారం బయటకు వచ్చిన తర్వాత రాములమ్మ బంధువుల ఇంట్లో ఆశ్రయం పొందినట్లు ఆమె వర్గం చెబుతోంది.
అక్కడ ఉన్న వృద్ధురాలిని మనవరాలు వినీత తీసుకెళ్లిందని ఆరోపణలు ఉన్నాయి. వీడియోలో ఓ వ్యక్తి వృద్ధురాలి చేయి పట్టుకుని తీసుకెళ్తున్న దృశ్యాలు కనిపిస్తున్నాయి. అయితే ఆమెను బలవంతంగా తీసుకెళ్లారా, లేక ఆమె సమ్మతితోనే వెళ్లిందా అన్నది అధికారుల విచారణలో తేలాల్సి ఉంది.
అత్తను నమ్మించి.. ఆస్తి దక్కించుకున్నారా
వృద్ధాప్యంలో తనను ఆదుకోవాల్సిన కుటుంబ సభ్యులే తన ఆస్తి విషయంలో మోసం చేశారని రాములమ్మ ఆరోపిస్తోంది. అల్లుడు రాములు తనను నమ్మించి భూమి విషయంలో మోసం చేశాడని ఆమె వాపోతోంది. తనకు తెలియకుండా జరిగిన భూ బదలాయింపును పరిశీలించి, తనకు న్యాయం చేయాలని అధికారులను వేడుకుంటోంది.
తహసీల్దార్‌ కార్యాలయాన్ని ఆశ్రయించిన బాధితురాలు
తనకు జరిగిన అన్యాయంపై న్యాయం చేయాలంటూ రాములమ్మ తహసీల్దార్‌ కార్యాలయాన్ని ఆశ్రయించినట్లు తెలిసింది. భూమి రికార్డులు, రిజిస్ట్రేషన్‌ పత్రాలు, ఆధార్‌ వివరాలు, సంబంధిత దస్తావేజులను అధికారులు పరిశీలించి అసలు విషయం తేల్చాలని ఆమె కోరుతోంది.
పత్రాలు బయటపెడితే.. అసలు గుట్టు రట్టయ్యేనా?
భూమి ఎప్పుడు బదలాయింపైంది. ఎవరి సమక్షంలో పత్రాలు జరిగాయి. వృద్ధురాలి సంతకం లేదా వేలిముద్ర ఎలా తీసుకున్నారు. రిజిస్ట్రేషన్‌ సమయంలో ఆమెకు విషయం పూర్తిగా వివరించారా? ఆధార్‌ అప్‌డేట్‌ పేరుతో తీసుకెళ్లిన వ్యవహారం నిజమేనా? అనే ప్రశ్నలు తలెత్తుతున్నాయి.
