స్త్రీ నిధిలో రూ.25 లక్షల గోల్‌మాల్‌!
మహిళా సంఘాల సభ్యులు చెల్లించిన సొమ్ము సొంత అవసరాలకు వినియోగం..
గ్రామసభలో అంగీకరించినట్లు వెల్లడి
సోషల్ ఆడిట్‌తో వెలుగులోకి.. మహిళా సంఘాల సభ్యుల్లో ఆందోళన
సీకే న్యూస్‌ ఖమ్మం ప్రతినిధి ఇస్లావత్ నరసింహ ఏన్కూరు నవంబర్ 02 2026: ఖమ్మం జిల్లా ఏన్కూరు మండలం రేపల్లెవాడ గ్రామపంచాయతీలో స్త్రీ నిధి రుణాల చెల్లింపులకు సంబంధించిన నగదు వ్యవహారం కలకలం రేపుతోంది. మహిళా సంఘాల సభ్యులు నెలనెలా చెల్లించిన రుణ వాయిదాల సొమ్మును సంబంధిత ఖాతాల్లో జమ చేయకుండా, సుమారు రూ.25 లక్షలను వ్యక్తిగత అవసరాలకు వినియోగించినట్లు గ్రామ దీపిక రమాదేవి గ్రామసభలో అంగీకరించినట్లు సమాచారం. ఈ వ్యవహారం సోషల్ ఆడిట్‌లో వెలుగులోకి రావడంతో మహిళా సంఘాల సభ్యుల్లో ఆందోళన నెలకొంది.
స్త్రీ నిధి ద్వారా రుణాలు పొందిన మహిళా సంఘాల సభ్యులు ప్రతి నెలా తమ వాయిదాలను క్రమం తప్పకుండా చెల్లిస్తున్నట్లు తెలిసింది. అయితే, సభ్యులు చెల్లించిన నగదు సంబంధిత ఖాతాల్లో జమ కాకపోవడంతో నిధుల లావాదేవీలపై అనుమానాలు వ్యక్తమయ్యాయి. ఈ నేపథ్యంలో నిర్వహించిన సోషల్ ఆడిట్‌లో నగదు వ్యవహారం వెలుగులోకి వచ్చినట్లు సమాచారం.
ఈ అంశంపై సర్పంచ్ అజ్మీర సురేష్ నాయక్ అధ్యక్షతన గ్రామసభ నిర్వహించారు. సుమారు రూ.25 లక్షల నగదును వ్యక్తిగత అవసరాలకు వినియోగించినట్లు గ్రామ దీపిక రమాదేవి అంగీకరించినట్లు సమాచారం. మహిళా సంఘాల సభ్యులు చెల్లించిన సొమ్ము వారి రుణ ఖాతాల్లో జమ కాకపోవడంపై గ్రామసభలో చర్చించినట్లు తెలిసింది.
స్త్రీ నిధికి సంబంధించిన లావాదేవీల్లో ఎంత మొత్తం వసూలైంది? ఎంత మొత్తం సంబంధిత ఖాతాల్లో జమైంది? ఎంత మొత్తం వినియోగించారు? ప్రస్తుతం ఎంత బకాయి ఉంది? అనే అంశాలపై పూర్తిస్థాయి లెక్కలు తేల్చాల్సిన అవసరం ఉంది. మహిళా సంఘాల సభ్యులు చెల్లించిన సొమ్ముకు సంబంధించిన వివరాలను అధికారులు పరిశీలించి, వాస్తవాలను వెల్లడించాల్సి ఉంది.
మహిళలు కష్టపడి సంపాదించిన సొమ్మును రుణ వాయిదాల రూపంలో చెల్లిస్తే, ఆ నగదు సక్రమంగా ఖాతాల్లో జమ కావాల్సిన బాధ్యత సంబంధిత సిబ్బందిపై ఉంటుంది. ఈ నేపథ్యంలో ఉన్నతాధికారులు సమగ్ర విచారణ చేపట్టి, నిధుల వ్యవహారంలో బాధ్యులను గుర్తించడంతోపాటు, వినియోగించిన మొత్తాన్ని తిరిగి రాబట్టి మహిళా సంఘాల సభ్యులకు న్యాయం చేయాలని గ్రామస్థులు కోరుతున్నారు.
మహిళా సంఘాల సొమ్ముకు భద్రత కల్పించే విషయంలో అధికారులు ఎలాంటి చర్యలు తీసుకుంటారన్నది ప్రస్తుతం చర్చనీయాంశంగా మారింది.
గ్రామసభలో పాల్గొన్నవారు స్త్రీ నిధి మేనేజర్ వేణుగోపాల చారి, రీజినల్ మేనేజర్ రవీందర్ నాయక్, ఏపీఎం , సీసీ లు, సర్పంచ్ అజ్మీర సురేష్ నాయక్, ఉపసర్పంచ్ కాళంగి వీరభద్రం, మహిళా సంఘాల సభ్యులు తదితరులు పాల్గొన్నారు.
